കൊച്ചി: മരുന്ന് നിര്മാണരംഗത്തെ സാധ്യതകള് ഉപയോഗപ്പെടുത്തുന്നതിന് ഇന്ത്യ മുന്നിട്ടിറങ്ങണമെന്ന് അമേരിക്കയിലെ മിഷിഗന് സ്റ്റേറ്റ് യൂണിവേഴ്സിറ്റി ഹോട്ടികള്ച്ചര് വകുപ്പിന്റെ കീഴിലുള്ള ബയോആക്ടീവ് നാച്ചുറല് പ്രൊഡക്ട്സ് ആന്റ് ഫാര്മസ്യൂട്ടിക്കല്സ് ലബോറട്ടറി മുഖ്യഗവേഷകനും പ്രൊഫസറുമായ ഡോ. മുരളീധരന് ജി. നായര്. കേരള ഫിഷറീസ് സമുദ്രപഠന സര്വകലാശാലയിലെ (കുഫോസ്) ഗവേഷണ കേന്ദ്രമായ സെന്ര് ഫോര് ബയോ ആക്ടീവ് കോംമ്പൗണ്ട്സ് ഫ്രം മറൈന് ഓര്ഗാനിസം സംഘടിപ്പിച്ച രോഗചികിത്സയ്ക്ക് പ്രകൃതിയില് നിന്നും ഔഷധം എന്ന വിഷയത്തില് പ്രഭാഷണം നടത്തുകയായിരുന്നു അദ്ദേഹം.
പരമ്പരാഗതമായി ഔഷധസസ്യമായി ഇന്ത്യയില് ഉപയോഗിച്ചു വരുന്ന അശ്വഗന്ധ സസ്യത്തില് നിന്നും അള്ഷിമേഴസ് രോഗചികിത്സയ്ക്കായി മലയാളിയായ ഡോ മുരളീധരന് നായര് വികസിപ്പിച്ചെടുത്ത മിശ്രിതത്തിന്റെ മരുന്ന് പരീക്ഷണം നടന്നുകൊണ്ടിരിക്കുകയാണ്. അശ്വഗന്ധസസ്യത്തില് നിന്നും അള്ഷിമേഴ്സ് രോഗത്തിനുള്ള മരുന്ന് ടാബ്ലറ്റ് അല്ലെങ്കില് ക്യാപ്സൂള് രൂപത്തില് ഒന്നോ രണ്ടോ വര്ഷത്തിനുള്ളില് പുറത്തിറക്കാനാകുമെന്നാണ് പ്രതീക്ഷ.
ശക്തമായ ആന്റി ഓക്സിഡന്റുകളടങ്ങിയ അശ്വഗന്ധസസ്യം നിരവധി രോഗങ്ങള്ക്ക് പ്രതിവിധിയാണ്. നാട്ടുവൈദ്യങ്ങളുടെ ശാസ്ത്രീയമായ അടിത്തറ കണ്ടെത്തുന്നതിന്റെ ഭാഗം കൂടിയാണ് തന്റെ ഗവേഷണം. സമുദ്രജീവികളില് നിന്നുള്ള ഔഷധനിര്മ്മാണരംഗത്ത് കുഫോസ് കൂടുതല് ഗവേഷണപ്രവര്ത്തനങ്ങള്ക്ക് നേതൃത്വം നല്കുമെന്ന് വൈസ് ചാന്സലര് ഡോ ബി. മധുസൂദനക്കുറുപ്പ് പറഞ്ഞു. പ്രോ വൈസ് ചാന്സലര് ഡോ. കെ. പത്മകുമാര് സ്വാതമാശംസിച്ചു.
