ന്യൂദല്ഹി: ആം ആദ്മി പാര്ട്ടിയുടെ അച്ചടക്ക സമിതിയില് നിന്നും പ്രശാന്ത് ഭൂഷണിനേയും ലോക്പാല് സമിതിയില് നിന്നും മുന് നാവികസേന തലവനായിരുന്ന അഡ്മിറല് എല്.രാംദാസിനേയും പാര്ട്ടി നീക്കം ചെയ്തു. ഞായറാഴ്ച കൂടിയ അടിയന്തര മീറ്റിംഗിലാണ് തീരുമാനം. കഴിഞ്ഞ ദിവസം പാര്ട്ടിയുടെ ദേശീയ എക്സിക്യൂട്ടീവില് നിന്നും മുതിര്ന്ന നേതാക്കളായ യോഗേന്ദ്ര യാദവിനേയും, പ്രശാന്ത് ഭൂഷണേയും പുറത്താക്കിയിരുന്നു.
അച്ചടക്കസമിതിയില് നിന്നും ഭൂഷണിനെ പുറത്താക്കി പകരം ദിനേഷ് വാഗ്ഹേല തലവനാകുന്ന മൂന്നംഗ പാനലിനെ നിയോഗിക്കാനാണ് തീരുമാനം. അരവിന്ദ് കേജ്രിവാളും, ആശിഷ് ഖേതനും, ദേശീയ സെക്രട്ടറി പങ്കജ് ഗുപ്തയുമായിരിക്കും മറ്റ് അംഗങ്ങള്.
പുതിയ ലോക്പാല് പാനലില് മുന് ഐ.എ.എസ് ഓഫീസര്മാരായ എന്. ദിലീപ് കുമാര്, രാകേഷ് സിന്ഹ, വിദ്യാഭ്യാസവിദഗ്ദ്ധനായ എസ്.പി വര്മ എന്നിവരുണ്ടാകും. ഇവര് മൂവരും പാര്ട്ടിയുടെ ലോക്പാല് പാനലിന്റെ ഭാഗമാകാന് സമ്മതം നല്കിയിട്ടുണ്ടെന്ന് പാര്ട്ടിയുടെ ദേശീയ സെക്രട്ടറി പങ്കജ് ഗുപ്ത പറഞ്ഞു.
