ചെങ്ങന്നൂരില്‍ സിപിഎമ്മും സിപിഐയും രണ്ടായി പ്രകടനം നടത്തി

ചെങ്ങന്നൂര്‍: ഇടതു മുന്നണിക്കുള്ളിലെ ചേരിപോര് വെളിവാക്കി നഗരത്തില്‍ സിപിഎം, സിപിഐ പ്രവര്‍ത്തകര്‍ രണ്ടായി പ്രകടനം നടത്തി. എല്‍ഡിഎഫ് ആഹ്വാനം ചെയ്ത ഹര്‍ത്താലിനോടനുബന്ധിച്ചായിരുന്നു ഇരുവരുടെയും പ്രകടനം. മാര്‍ച്ച് 14ന് രാവിലെ 11ന് സിപിഎമ്മുകാരും വൈകിട്ട് 4.30ന് സിപിഐക്കാരുമാണ് പ്രകടനം നടത്തിയത്. കഴിഞ്ഞ കുറേ നാളുകളായി ചെങ്ങന്നൂരില്‍ ഇരുവിഭാഗവും തമ്മില്‍ രൂക്ഷമായ തര്‍ക്കം നിലനിന്നുവരുന്നുണ്ട്. ജില്ലാ നേതൃത്വം പ്രശ്‌നം പരിഹരിക്കാന്‍ നിരവധി തവണ ശ്രമം നടത്തിയെങ്കിലും സാധിച്ചില്ല. കഴിഞ്ഞ ദിവസം നടന്ന താലൂക്ക് ഓഫീസ് ഉപരോധത്തിനും ഇരുവിഭാഗങ്ങളും രണ്ടായി പ്രകടനം നടത്തിയാണ് സമരത്തില്‍ പങ്കെടുത്തത്. സിപിഎം നടത്തുന്ന പരിപാടികള്‍ സിപിഐയുമായി ആലോചിക്കാറില്ലെന്നും, ഇവര്‍ തങ്ങളെ അടിയാന്‍മാരായാണ് കാണുന്നതെന്നും ഒരു ഉന്നത സിപിഐ നേതാവ് ആരോപിച്ചു.