കൊച്ചി: ഫിഷറീസ് സര്വകലാശാലയില് വകുപ്പുമന്ത്രിയുടെ നിര്ദ്ദേശമനുസരിച്ച് തുടങ്ങിയ വനാമി ചെമ്മീന് കൃഷി അഴിമതി കൃഷിയായെന്നു പരാതി. കഴിഞ്ഞ ഡിസംബറില് തുടങ്ങിയെന്നു പറയപ്പെടുന്ന ‘വനാമി ചെമ്മീന് കൃഷി’യെക്കുറിച്ച് വൈസ് ചാന്സിലറും മന്ത്രിയും വിവിധ വേദികളില് പ്രസംഗിച്ചുനടക്കുന്നതല്ലാതെ ഒന്നും നടക്കുന്നില്ല.
സര്വകലാശാലയുടെ എഞ്ചിനീയറിംഗ് വിഭാഗം പുതുവൈപ്പിനാല് കുളം കുഴിച്ചു നടക്കുന്നതൊഴിച്ചാല് ഇതുവരെ കാര്യമായി ഒന്നും തന്നെ നടന്നിട്ടില്ല എന്നുപറയുന്നു. ഇപ്പോള് തന്നെ പദ്ധതിക്ക് 16 ലക്ഷത്തോളം രൂപ ചെലവായിട്ടുണ്ട്. പനങ്ങാട് കോണ്ഫറന്സ് ഹാളില് ഇടയ്ക്കിടെ യോഗങ്ങള് കൂടിയും ചായ കുടിച്ചും വനാമി കൃഷി വിലയിരുത്തുന്നുണ്ടെന്നത് തന്നെ ഭാഗ്യം! പുതുവൈപ്പിലെ ഭൂപ്രകൃതി കൃത്യമായി അറിയാത്ത ശാസ്ത്രജ്ഞര്, കുളത്തിന് വീണ്ടും വീണ്ടും ആഴം കൂട്ടാന് പറയുമ്പോഴും ചതുപ്പു നിറഞ്ഞ പുതുവൈപ്പിലെ ഭൂപ്രകൃതിയില് വശങ്ങള് ഇടിഞ്ഞ് ഉള്ള കുളങ്ങളെല്ലാം ‘കുളമാകുന്നത്’ കോണ്ട്രാക്ടര്ക്കും എഞ്ചിനീയര്മാര്ക്കും ഒത്തിരി സന്തോഷം നല്കുന്നുണ്ട്.
ഇക്കണക്കിനു പോയാല് ഈ സീസണില് ചെമ്മീന് കൃഷി ഇറക്കാനാവില്ലെന്നാണ് അനുഭവജ്ഞാനമുള്ളവര് പറയുന്നത്. അതുമാത്രമല്ല വിളവെടുപ്പിനു മുമ്പ് കാലവര്ഷമെത്തിയാല് ഇനി നിക്ഷേപിക്കാന് പോകുന്ന ചെമ്മീന് കുഞ്ഞുങ്ങള്ക്കായി മുടക്കുവാന് പോവുന്ന കാശുപോലും കിട്ടില്ല. അടുത്ത ജൂണ് മാസത്തില് മന്ത്രിയേയും പത്രക്കാരേയും കാണിക്കുവാന് മറ്റു സംസ്ഥാനങ്ങളില് കൃഷി ചെയ്ത വനാമി ചെമ്മീനെ കൊണ്ടുവന്നു കാണിച്ചാലും അത്ഭുതപ്പെടാനില്ല എന്നാണ് ഇപ്പോള് പരിസരവാസികള് പറയുന്നത്.
