കൊല്ലം: പ്രവാസികള്ക്ക് നാട്ടില് സുരക്ഷിതത്വമൊരുക്കി ബിജെപി പ്രവാസിസെല് രൂപീകൃതമാകുന്നു. സെല്ലിന്റെ ഉദ്ഘാടനം 30ന് വൈകിട്ട് മൂന്നിന് ബിജെപി സംസ്ഥാനപ്രസിഡന്റ് വി.മുരളീധരന് ചിന്നക്കട ജില്ലാസഹകരണബാങ്ക് ആഡിറ്റോറിയത്തില് നിര്വഹിക്കും. ഇതിനോടനുബന്ധിച്ച പ്രവാസിസംഗമവും നടക്കും. പരിപാടിയില് ജില്ലാപ്രസിഡന്റ് എം.സുനില് അദ്ധ്യക്ഷത വഹിക്കും.
പ്രവാസിഭാരതീയര്ക്ക് വോട്ടവകാശം ഉറപ്പാക്കിയ മോദിസര്ക്കാരിന്റെ പ്രവാസി അനുകൂലനടപടികള് ജനങ്ങളിലെത്തിക്കുകയാണ് ബിജെപി സെല്ലിന്റെ പ്രധാന ലക്ഷ്യമെന്ന് സെല് ഇന് ചാര്ജ് സുജിത് സുകുമാരന് പത്രസമ്മേളനത്തില് അറിയിച്ചു.
പ്രവാസികളുടെ നാട്ടിലുള്ള സ്വത്തുക്കള്ക്കും വസ്തുക്കള്ക്കും സംരക്ഷണം നല്കുക, വിവിധ തൊഴിലുകളില് വൈദഗ്ധ്യമുള്ളവര്ക്ക് സര്ട്ടിഫിക്കേഷന് നല്കുക, പ്രവാസികള്ക്കായി പ്രൈമറി എഡ്യുക്കേഷന്സെല് രൂപീകരിക്കുക, അഡൈ്വസറിസെല് രൂപീകരിക്കുക, വ്യാജറിക്രൂട്ടിങും സ്വകാര്യഏജന്സികളുടെ ചൂഷണവും തടയുന്നതിന് സര്ക്കാരിന്റെ നേതൃത്വത്തില് എംപ്ലോയ്മെന്റ് ഏജന്സി ആരംഭിക്കുക തുടങ്ങിയവയും സെല്ലിന്റെ ലക്ഷ്യങ്ങളില് ചിലതാണ്.
പ്രവാസികളുടെ നിക്ഷേപങ്ങള് മികച്ച മേഖലകളിലേക്ക് വഴിതിരിച്ചുവിടാന് സര്ക്കാരിന് കഴിയണമെന്ന് സുജിത് സുകുമാരന് പറഞ്ഞു. അന്യദേശങ്ങളില് പോയി കഠിനാധ്വാനം ചെയ്ത് കിട്ടുന്ന വിദേശനാണ്യം ഭാരതത്തിലെത്തിക്കുന്ന ഇവര്ക്ക് തിരിച്ചെത്തിയാന് ഇന്ഷുറന്സ്, തൊഴില്സംരക്ഷണം, പെന്ഷന് ആനുകൂല്യം, ചികിത്സാചിലവുകള് എന്നിവ ഉറപ്പാക്കാന് സര്ക്കാര് തയ്യാറാകണമെന്ന് അദ്ദേഹം ആവശ്യപ്പെട്ടു.
പ്രവാസികളുടെ വിധവകള്ക്കും പെണ്കുട്ടികളുടെ വിവാഹാവശ്യത്തിനും ധനസഹായം നല്കും. വിദേശരാജ്യങ്ങളില് മരണമടയുന്നവരുടെ മൃതദേഹങ്ങള് നാട്ടിലെത്തുക്കുന്ന കാര്യങ്ങളില് കേന്ദ്രകേരള മന്ത്രാലയങ്ങളില് നിന്നും സത്വരനടപടികള് ഉറപ്പാക്കും. വിദേശരാജ്യങ്ങളില് ജയിലില് കഴിയുന്ന പ്രവാസികള്ക്ക് നിയമസഹായങ്ങള് നല്കുവാനും പ്രവാസിസെല്ലിന് പദ്ധതിയുണ്ട്. പത്രസമ്മേളനത്തില് ബിജെപി ജില്ലാ വൈ.പ്രസിഡന്റ് എസ്.ദിനേശ്കുമാര്, പ്രവാസിസംഗമം കോര്ഡിനേറ്റര് ബി.ബിനേഷ് എന്നിവര് പങ്കെടുത്തു.
പ്രതികരിക്കാൻ ഇവിടെ എഴുതുക: