പെഷവാര്‍: താലിബാന്‍ ഭീകരര്‍ വിദ്യാര്‍ത്ഥികളെയും അധ്യാപകരെയും കൂട്ടക്കൊല ചെയ്ത പാക്കിസ്ഥാനിലെ പെഷവാറിലെ സൈനിക സ്‌കൂള്‍ വീണ്ടും തുറന്നു. 130ലേറെ കുട്ടികളടക്കം 150 പേര്‍ കൊല്ലപ്പെട്ട, ലോകമന:സാക്ഷിയെ ഞെട്ടിച്ച സംഭവത്തിനുശേഷം സ്‌കൂള്‍ അടച്ചിട്ടിരിക്കുകയായിരുന്നു.
സ്‌കൂളില്‍ സംഘടിപ്പിച്ച ചടങ്ങില്‍ പാക് സൈനിക മേധാവി ജനറല്‍ റഹീല്‍ ഷരീഫ് കുട്ടികളേയും മാതാപിതാക്കളേയും സ്വീകരിച്ചു. ഏവരും വേദനകള്‍ കടിച്ചമര്‍ത്തിക്കൊണ്ട് സ്‌കൂള്‍ ദിനങ്ങള്‍ക്ക് വീണ്ടും തുടക്കമിട്ടു. ഭീകരതയ്‌ക്ക് കീഴടങ്ങാന്‍ തങ്ങള്‍ ഒരിക്കലും ഭീരുക്കളല്ലെന്ന് തെളിയിക്കുന്നതായിരുന്നു ചടങ്ങുകള്‍. പത്താം ക്ലാസുകാരനായിരുന്ന തന്റെ മകനെ ഭീകരര്‍ വധിച്ചെങ്കിലും അധ്യാപികയായ അന്‍ലീബ് അഫ്താബും കറുത്ത വസ്ത്രങ്ങളണിഞ്ഞ് ചടങ്ങില്‍ പങ്കെടുത്തു.
കറുത്ത ദിനത്തിന്റെ ഓര്‍മ്മകളൊന്നും അവശേഷിപ്പിക്കാതെ സ്‌കൂളിലെ കെട്ടിടങ്ങളെല്ലാം പുതുക്കിപ്പണിതിരുന്നു. വിദ്യാര്‍ത്ഥികളെയും അധ്യാപകരെയും സ്വീകരിക്കുന്ന ചടങ്ങിന്റെ ഭാഗമായി ശക്തമായ സുരക്ഷാ സംവിധാനങ്ങളും ഒരുക്കി. സ്‌കൂളിന്റെ നൂറ് മീറ്റര്‍ അകലെ വരെ മാത്രമെ മാധ്യമപ്രവര്‍ത്തകരുടെവരെ വാഹനങ്ങള്‍ പ്രവേശിപ്പിച്ചിരുന്നുള്ളു.
പട്ടാള യൂണിഫോമിലെത്തിയ ആറ് ഭീകരരാണ് ഡിസംബര്‍ 16ന് പെഷവാര്‍ സൈനിക സ്‌കൂളില്‍ ആക്രമണം നടത്തിയത്. വെടിവെച്ചും ബോംബുകള്‍ പൊട്ടിച്ചും അവര്‍ കുട്ടികളെ കൊന്നുതള്ളിയപ്പോള്‍ ലോകം നടുങ്ങി. വടക്കന്‍ വസീരിസ്താനിലെ സൈനിക നടപടികള്‍ക്ക് പ്രതികാരമായാണ് തെഹ്‌രിക് ഇ താലിബാന്‍ സ്‌കൂള്‍ ആക്രമിച്ചത്.
