കറാച്ചി: തെക്കന് പാക്കിസ്ഥാനിലെ ഷികാര്പുരില് ഓയില് ടാങ്കറും ബസും കൂട്ടിയിടിച്ച് 57 പേര് കൊല്ലപ്പെട്ടു. കൊല്ലപ്പെട്ടവരില് കുട്ടികളും സ്ത്രീകളും ഉള്പ്പെടുന്നുണ്ട്. നിരവധി പേര്ക്ക് പരിക്കേറ്റു. ഞായറാഴ്ച പുലര്ച്ചെ സുപ്പര്ഹൈവേ ലിങ്കിലാണ് അപകടം ഉണ്ടായത്.
പെട്രോള് കയറ്റിവന്ന ടാങ്കര് ലോറിയും കറാച്ചിയില് നിന്നു ഷികാര്പുറിലേക്ക് വരികയായിരുന്ന ബസും തമ്മില് കൂട്ടിയിടിക്കുകയായിരുന്നു. ഇടിയെ തുടര്ന്ന് ഇരുവാഹനങ്ങളും കത്തിനശിച്ചു. അപകടം സംഭവിച്ച സ്ഥലത്തു നിന്ന് ഇതുവരെ 57 മൃതദേഹങ്ങള് ലഭിച്ചതായി കറാച്ചിയിലെ ജിന്ന ആശുപത്രിയിലെ ഡോക്ടര് സെമി ജമാലി പറഞ്ഞു. മരണസംഖ്യ ഇനിയും ഉയരാനാണ് സാധ്യതയെന്നും അദ്ദേഹം പറഞ്ഞു.
ബസിനുമുകളില് യാത്ര ചെയ്തിരുന്നവര് മാത്രമാണ് പരിക്കുകളോടെ രക്ഷപ്പെട്ടത്. ഏറെനേരത്തെ പരിശ്രമത്തിന് ശേഷമാണ് തീ നിയന്ത്രണവിധേയമാക്കിയത്. അനുവദിച്ചതിലും അധികം യാത്രക്കാര് ബസില് ഉണ്ടായിരുന്നതായി അപകടത്തില് രക്ഷപ്പെട്ടയാള് മാധ്യമങ്ങളോട് പറഞ്ഞു.
ലോറി ഡ്രൈവര് അശ്രദ്ധയോടെ വാഹനം ഓടിച്ചതാണ് അപകട കാരണമെന്ന് കറാച്ചി കമ്മീഷണര് അറിയിച്ചു. 2011നു ശേഷം പാക്കിസ്ഥാനില് റിപ്പോര്ട്ട് ചെയ്യപ്പെട്ട 9,000ഓളം റോഡപകടങ്ങളില് 4,500 പേര് മരിച്ചിട്ടുണ്ട്.
