ശബരിമല : സന്നിധാനത്തെത്തുന്ന ഭക്തരെ താമസ സൗകര്യം നല്‍കുന്നതിന്റെ പേരില്‍ ദേവസ്വം ബോര്‍ഡ് കൊള്ളയടിക്കുന്നു. മലകയറി സന്നിധാനത്തെത്തി അല്‍പനേരം വിശ്രമിക്കുവാനും ദേഹശുദ്ധി വരുത്താനുമായി ദേവസ്വം ബോര്‍ഡ് ഒരുക്കിയിരിക്കുന്ന മുറികള്‍ നല്‍കുന്ന കാര്യത്തിലാണ് ഭക്തരെ ചൂഷണം ചെയ്യുന്നത്. 12 മണിക്കൂറാണ് ഒരു ഭക്തന് വിശ്രമിക്കാനും കുളിക്കുവാനും സമയം നല്‍കിയിരിക്കുന്നത്. ഇതിനായി ബോര്‍ഡ് ഈടാക്കുന്ന തുക ഒരാള്‍ക്ക് 100, 150, 250 രൂപ കണക്കിനാണ്.
മകര വിളക്ക് അടുത്തപ്പോള്‍ ഭക്തരുടെ വരവ് ക്രമാതീതമായി വര്‍ദ്ധിച്ചതോടെ ദേവസ്വം ബോര്‍ഡ് ഒരു മുറിക്കായി എത്തുന്ന ഭക്തരോട് മുറികള്‍ ഒന്നും ഇല്ലെന്നും പത്തുപേര്‍ക്കുള്ള മുറികള്‍ മാത്രമാണ് ഉള്ളതെന്നും പറഞ്ഞ് മുറികള്‍ നല്‍കാതിരിക്കുകയും എന്നാല്‍ മുറികള്‍ നല്കി കഴിഞ്ഞാല്‍ പത്തുപേരുടെ വാടക ഒരാളിന്റെ പക്കല്‍നിന്ന് വാങ്ങുകയും ചെയ്യുന്നു. ഇതുകാരണം മുറി ലഭിക്കുന്ന ഒരു ഭക്തന് നാലിരട്ടി രൂപ നല്‍കേണ്ട അവസ്ഥയാണ്. നൂറോ ഇരുനൂറോ നല്‍കേണ്ട ഒരു ഭക്തന് 12 മണിക്കൂര്‍നേരത്തേക്ക് മൂവായിരം രൂപവരെ നല്‍കേണ്ട ഗതികേടിലാണ്.
സന്നിധാനത്ത് നിര്‍മ്മിച്ചിരിക്കുന്ന കെട്ടിടങ്ങളില്‍ ഭൂരിഭാഗവും നിര്‍മ്മിച്ചിരിക്കുന്നത് സ്വകാര്യവ്യക്തികളും സ്ഥാപനങ്ങളും സ്‌പോണ്‍സര്‍ചെയ്ത മന്ദിരങ്ങളാണ്. ഇവര്‍ ഇത് നിര്‍മ്മിച്ച് നല്‍കിയത് ശബരിമലയില്‍ എത്തുന്ന ഭക്തര്‍ക്ക് വിശ്രമിക്കുവാനും പ്രാഥമിക കൃത്യങ്ങള്‍ നടത്തി ദേഹശുദ്ധി വരുത്തി അയ്യപ്പസ്വാമിയെ ദര്‍ശിക്കാനുമാണ്. എന്നാല്‍ ദേവസ്വംബോര്‍ഡിന് ഒരു രൂപ പോലും മുടക്കില്ലാതെ നിര്‍മ്മിച്ച കെട്ടിടങ്ങളില്‍ താമസത്തിനെത്തുന്ന ഭക്തരോട് ദേവസ്വംബോര്‍ഡ് കാണിക്കുന്ന ഈ പകല്‍കൊള്ള അനേകം ഭക്തരെ വിഷമത്തിലാക്കുന്നു. മുതിര്‍ന്ന അയ്യപ്പഭക്തര്‍ക്കൊപ്പം എത്തുന്ന ചെറിയകുട്ടികള്‍ക്ക് വാടക നല്‍കേണ്ടന്നാണ് ബോര്‍ഡ് പറയുന്നതെങ്കിലും കുട്ടികളുടെ ഉള്‍പ്പടെ തല എണ്ണി ബോര്‍ഡ് പണം വാങ്ങുന്നുണ്ട്.
പ്രതികരിക്കാൻ ഇവിടെ എഴുതുക: