പാരീസ്: ഫ്രാന്സിനെ വിറങ്ങലിപ്പിച്ച് ഭീകരവിളയാട്ടം തുടരുന്നു.
ആക്ഷേപഹാസ്യവാരിക ഷാര്ലെ ഹെബ്ദോയുടെ ആസ്ഥാനത്തെ കൂട്ടക്കുരുതിക്ക് പിന്നില് പ്രവര്ത്തിച്ച ഭീകരരെ സുരക്ഷാസേന ഇന്നലെ ഒളിത്താവളം വളഞ്ഞ് വകവരുത്തി.
കീഴടക്കാനുള്ള തീവ്രശ്രമം ഇന്നലെ ഉദ്വേഗഭരിതമായ രീതിയിലാണ് അവസാനിച്ചത്.
പോലീസിനെ വെട്ടിച്ചുകടന്ന ഷെരീഫ് കൗച്ചിനെയും സയീദ് കൗച്ചിനെയുമാണ് കൊന്നത്. ഒരാളെ ഇവര് ബന്ദിയാക്കി, ഒളിച്ച കെട്ടിടം ഫ്രഞ്ച് പോലീസും സൈന്യവും വളയുകയായിരുന്നു. തുടര്ന്നുണ്ടായ ഏറ്റുമുട്ടലിനൊടുവിലാണ് രണ്ടുപേരെയും കൊന്നത്.
അതിനിടെ, കിഴക്കന് പാരീസില് മറ്റൊരു ഭീകരന് അഞ്ചുപേരെ ബന്ദികളാക്കിയെന്ന വാര്ത്തകള് നഗരത്തെ വീണ്ടും ഭീതിയിലാക്കി. ഭീകരരെ പിടികൂടാന് 80000 സുരക്ഷാ ഉദ്യോഗസ്ഥരെയാണ് പാരീസിലും പ്രാന്തപ്രദേശങ്ങളിലും വിന്യസിച്ചിരിക്കുന്നത്. കൗച്ച് സഹോദരന്മാര്ക്കുവേണ്ടിയുള്ള ഊര്ജ്ജിതമായ തിരച്ചില് തുടരവെ വെള്ളിയാഴ്ച രാവിലെ അവര് നഗരത്തില് പ്രത്യക്ഷപ്പെടുകയായിരുന്നു.
വടക്കുകിഴക്കന് പാരീസിന് 50 കിലോമീറ്റര് മാറി മോണ്ടെഗെനി സെയിന്റെ ഫെലിസൈറ്റില് നിന്ന് കാര് മോഷ്ടിച്ചാണ് കൗച്ച് സഹോദരന്മാര് കടന്നുകളഞ്ഞത്. പോലീസും സൈന്യവും ഇവരെ ഏറെനേരം പിന്തുടര്ന്നു. രൂക്ഷമായ വെടിവെയ്പ്പും ഉണ്ടായി.
ഒടുവില് ഡമ്മാര്ട്ടിനിലെ വ്യാവസായിക മേഖലയിലെ അച്ചടിസ്ഥാപനത്തില് കയറിയ ഭീകരര് ഒരാളെ ബന്ദിയാക്കി. കെട്ടിടത്തിലേക്ക് പ്രവേശിക്കുന്നതിന് മുന്പ് ഭീകരര് നടത്തിയ വെടിവെയ്പ്പില് ഒരാള് കൊല്ലപ്പെട്ടു. നിരവധി പേര്ക്കു പരിക്കേറ്റു.
കെട്ടിടം വളഞ്ഞ സുരക്ഷാസേനയോട് തങ്ങള് മരിക്കാന് തയ്യാറായാണ് വന്നിരിക്കുന്നതെന്ന് ഭീകരര് വ്യക്തമാക്കി. ഇതോടെ മേഖലയില് ഹെലികോപ്ടറുകളും എയര് ആംബുലന്സുകളും വിന്യസിച്ചു. പുതിയ സംഭവവികാസങ്ങളുടെ പശ്ചാത്തലത്തില് ഡമ്മാര്ട്ടിനു സമീപത്തെ ചാള്സ് ഡി ഗുല്ലെസ് വിമാനത്താവളത്തിന് അകത്തേക്കും പുറത്തേക്കുമുള്ള സര്വീസുകള് നിര്ത്തിവച്ചു.
ഭീകരര് റോക്കറ്റുകള് ഉപയോഗിച്ച് വിമാനങ്ങളെ വീഴ്ത്താനുള്ള സാധ്യത കണക്കിലെടുത്തായിരുന്നു ഇത്. നഗരവാസികളോട് വീടിന് പുറത്തിറങ്ങരുതെന്നും നിര്ദേശിച്ചിരുന്നു. സ്കൂള് അധികൃതരോട് വിദ്യാര്ത്ഥികളെ അടച്ചിട്ട ക്ലാസുകളില് സംരക്ഷിക്കാനും ഉത്തരവിട്ടു. ഇതിനിടെയാണ്, കിഴക്കന് പാരീസിലെ ഒരു പലച്ചരക്കുകട ആക്രമിച്ച മറ്റൊരു ഭീകരന് അഞ്ചുപേരെ ബന്ദികളാക്കിയത്.
ഇവിടെ രണ്ടുപേര് കൊല്ലപ്പെട്ടെന്നും റിപ്പോര്ട്ടുകളുണ്ട്. വ്യാഴാഴ്ച മോണ്ട്രൗഗ് നഗരത്തില് വനിതാ പോലീസ് ഓഫീസറെ വെടിവച്ചുകൊന്ന ഭീകരരില് ഒരുവനാണ് ഇയാളെന്ന് അധികൃതര് സംശയിക്കുന്നു. ഇതോടെ ചാര്ലെ ഹെബ്ദോ ആക്രമണത്തിനും പോലീസുകാരിയുടെ വധത്തിനും പരസ്പര ബന്ധമുണ്ടെന്നും സ്ഥിരീകരിച്ചു.
