ആലപ്പുഴ: റവന്യു ജില്ലാ ഓര്‍ഫനേജ് ഫെസ്റ്റ് ജനുവരി 10ന് ലജനത്തുല്‍ മുഹമ്മദിയ എച്ച്എസ്എസിലും ലിയോ തെര്‍ട്ടീന്ത് എച്ച്എസ്എസിലുമായി നടക്കുമെന്നു സംഘാടകര്‍ പത്രസമ്മേളനത്തില്‍ അറിയിച്ചു. കായികമത്സരങ്ങള്‍ രാവിലെ എട്ടിനു ലിയോ തെര്‍ട്ടീന്ത് എച്ച്എസ്എസ് ഗ്രൗണ്ടില്‍ തുടങ്ങും. ജൂനിയര്‍, സീനിയര്‍ ആണ്‍-പെണ്‍ കുട്ടികളുടെ 100 മീറ്റര്‍, 200 മീറ്റര്‍ ഓട്ടം, ലോങ്ജംപ്, ഹൈജംപ് 4×100 മീറ്റര്‍ റിലേ എന്നീ മത്സരങ്ങളാണു സംഘടിപ്പിക്കുന്നത്.
കലാമത്സരങ്ങള്‍ രാവിലെ 11ന് ലജനത്തുല്‍ മുഹമ്മദിയ സ്‌കൂളില്‍ നടക്കും. ഉച്ചയ്‌ക്ക് രണ്ടിനു കലോത്സവം ജി. സുധാകരന്‍ എംഎല്‍എ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് പ്രതിഭാ ഹരി അദ്ധ്യക്ഷത വഹിക്കും. രാത്രി ഏഴിനു സമാപന സമ്മേളനം കെ.സി. വേണുഗോപാല്‍ എംപി ഉദ്ഘാടനം ചെയ്യും. നഗരസഭാദ്ധ്യക്ഷ മേഴ്‌സി ഡയാന മാസിഡോ അദ്ധ്യക്ഷത വഹിക്കും.
ജില്ലയിലെ 77 അംഗീകൃത അനാഥാലയങ്ങളില്‍ നിന്നും വൃദ്ധമന്ദിരങ്ങളില്‍ നിന്നുമായി ആയിരത്തിലധികം ബാലപ്രതിഭകളും വൃദ്ധരും പങ്കെടുക്കും. പത്രസമ്മേളനത്തില്‍ വൈസ് ചെയര്‍മാന്‍ എസ്. ഭാസ്‌കരപിള്ള, ജനറല്‍ കണ്‍വീനര്‍ എ. സുലൈമാന്‍കുഞ്ഞ്, അബ്ദുള്‍സലാം ലബ്ബ, എം.ഇ. നിസാര്‍ അഹമ്മദ് എന്നിവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: