ബേസ്പോര്ഡ് കവറിനുമുകളില് കിടന്നുറങ്ങുന്ന ദിവസവേതന തൊഴിലാളികള്
ശബരിമല : ദേവസ്വം ബോര്ഡിന്റെ ചിറ്റമ്മ നയം ദിവസ ജീവനക്കാരുടെ ജീവിതം ദുരിത പൂര്ണ്ണമാക്കുന്നു. ശബരിമല മണ്ഡലകാലം മുതല് രാപ്പകല് വ്യത്യാസമില്ലാതെ ദിവസവേതനാടിസ്ഥാനത്തില് ജോലി ചെയ്യുന്ന നിരവധി തൊഴിലാളികളാണ് പശുതൊഴുത്തിനേക്കാള് വൃത്തിഹീനമായ സ്ഥലത്ത് കിടക്കുന്നത്.
ശബരിമലയില് ഡ്യൂട്ടിക്കെത്തുന്ന ദേവസ്വം ബോര്ഡിന്റെ സ്ഥിരം ജീവനക്കാര്ക്ക് എല്ലാം ആനുകുല്യങ്ങളുമുള്ള താമസസൗകര്യം ഒരുക്കുമ്പോള് ദിവസവേതന തൊഴിലാളികള്ക്ക് തലചായിക്കാന് കൊടുത്ത സ്ഥലം അരവണ നിര്മ്മാണ ശാലയ്ക്ക് സമീപമുള്ള മൂത്രപ്പുരയോടു ചേര്ന്ന യാതൊരുവിധ സുരക്ഷിതത്വവുമില്ലാത്ത ഒരു ഹാളാണ്.
ഇഴജന്തുക്കളും പന്നികളും യഥേഷ്ടം വിഹരിക്കു സ്ഥലത്ത് കിടന്നുറങ്ങുന്ന നിരവധി തൊഴിലാളികള് ജീവന് പണയം വെച്ചാണ് കഴിഞ്ഞുകൂടുന്നത്. ലക്ഷക്കണക്കിന് അയ്യപ്പ ഭക്തന്മാര് ദര്ശനം നടത്തുന്ന ശബരിമലയില് ലഭിക്കുന്ന വരുമാനത്തിന്റെ ഒരംശം മാത്രം മതി ഇവര്ക്ക് തലചായ്ക്കുവാനുള്ള വൃത്തിയുള്ള കൂടാരങ്ങള് നിര്മ്മിക്കുവാന്. മൂത്രപ്പുരയില്നിന്നും കക്കൂസില്നിന്നും ഒലിച്ചിറങ്ങുന്ന മലിനജലം ചവിട്ടാതെ ഇവര് ഹാളിലേക്ക് കടക്കുന്നത് നാലഞ്ച് സിമന്റ് കട്ടകള് ഇട്ട് അതിനുമുകളിലൂടെയാണ്. കിടക്കുവാനോ ഇരിക്കുവാനോ ഇവര്ക്ക് വൃത്തിയുള്ള പായ് പോലും ദേവസ്വം ബോര്ഡ് നല്കാത്തത് വളരെ ദയനീയമാണ് .
പമ്പയില് നിന്ന് മിനറല് വാട്ടര് എത്തിക്കുന്ന കവറിനുമുകളിലാണ് ഈ തൊഴിലാളികള് കിടന്നുറങ്ങന്നത്. വര്ഷങ്ങള്ക്ക് മുമ്പ് അരവണ നിര്മ്മിച്ചിരുന്ന കമ്പനിയുടെ തൊഴിലാളികളുടെ മെസ്സായിരുന്നു ഈ സ്ഥലം.
വിവിധ സാംക്രമിക രോഗങ്ങള് പടര്ന്ന് പിടിക്കാവുന്ന വൃത്തിഹീനമായ ഈ സ്ഥലത്ത് കിടക്കുന്ന തൊഴിലാളികളെ ആരോഗ്യവകുപ്പും അവഗണിച്ച മട്ടാണ്.
