ശിവഗിരി: യുഎഇയിലെ പ്രശസ്ത കവി ഡോ. ഷിഹാബ് എം. ഖനേം 82-ാമത് ശിവഗിരി തീര്‍ത്ഥാടനത്തില്‍ പങ്കെടുക്കും. ഡിസംബര്‍ 30ന് വൈകുന്നേരം 5ന് നടക്കുന്ന ദൈവദശക രചനാ ശതാബ്ദി സമ്മേളനത്തിലാണ് അദ്ദേഹം പങ്കെടുക്കുന്നത്. ദൈവദശകം അറബി ഭാഷയിലേക്ക് തര്‍ജ്ജമ ചെയ്ത് അദ്ദേഹം സമ്മേളനത്തില്‍ അവതരിപ്പിക്കും. തുടര്‍ന്ന് ശ്രീനാരായണ പുരസ്‌കാരം നല്‍കി അദ്ദേഹത്തെ ശിവഗിരിമഠം ആദരിക്കും.
കവിയും, കവിതാ വിവര്‍ത്തകനും ചാര്‍ട്ടേഡ് എഞ്ചിനീയറുമായ ഡോ. ഷിഹാബ് എക്കണോമിക്‌സിലാണ് വെയില്‍സില്‍ നിന്നും ഡോക്ടറേറ്റ് എടുത്തിട്ടുള്ളത്. യുഎഇ സൊസൈറ്റി ഓഫ് എഞ്ചിനീയേഴ്‌സിന്റെ ടെക്‌നിക്കല്‍ മാസികയായ വേള്‍ഡ് ഓഫ് എഞ്ചിനീയറിംഗിന്റെ ചീഫ് എഡിറ്റര്‍ കൂടിയാണ് അദ്ദേഹം.
ദുബൈ പോര്‍ട്ടുകളുടെ ഡയറക്ടര്‍ ഓഫ് എഞ്ചിനീയറിങ് ആയി ജോലി നോക്കുന്ന അദ്ദേഹം 56 ബുക്കുകള്‍ പ്രസിദ്ധീകരിച്ചിട്ടുണ്ട്. ഇദ്ദേഹത്തിന് 2012 ല്‍ കൊല്‍ക്കത്തയില്‍ നിന്ന് ടാഗോര്‍ പീസ് അവാര്‍ഡ്, 2007ല്‍ ഷാര്‍ജ ഗവ. ബുക്ക് അവാര്‍ഡ്, ചെന്നൈയില്‍ നിന്ന് കവിതയ്‌ക്കുള്ള അവാര്‍ഡ്, 2012 ലും 2014ലും ദുബൈയില്‍ നിന്ന് ട്രാന്‍സലേഷന്‍ അവാര്‍ഡ് തുടങ്ങി നിരവധി അവാര്‍ഡുകള്‍ ലഭിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: