ആലപ്പുഴ: സൈഡ് കൊടുക്കുന്നതിനെ ചൊല്ലിയുണ്ടായ തര്‍ക്കത്തെ തുടര്‍ന്ന് ടിപ്പര്‍ ലോറിയില്‍ നിന്ന് കെഎസ്ആര്‍ടിസി ബസിലേക്ക് പെട്രോള്‍ നിറച്ച കുപ്പിയെറിഞ്ഞ സംഭവത്തില്‍ രണ്ടുപേരെ സൗത്ത് പോലീസ് പിടികൂടി. ലോറി ഡ്രൈവര്‍ പഴവീട് പുത്തന്‍ചിറയില്‍ ശ്യാം, ക്ലീനര്‍ വാടയ്‌ക്കല്‍ തുണ്ടുപറമ്പില്‍ അനന്തു എന്നിവരെയാണ് അറസ്റ്റ് ചെയ്തത്. ലോറിയും കസ്റ്റഡിയിലെടുത്തു.
വ്യാഴാഴ്ച രാത്രി ഒമ്പതോടെ കല്ലുപാലം ജങ്ഷനിലായിരുന്നു സംഭവം. എടത്വായില്‍ നിന്ന് ആലപ്പുഴയിലേക്ക് വന്ന കെഎസ്ആര്‍ടിസി വേണാട് ബസിലേക്കാണ് പെട്രോള്‍ ഒഴിച്ചത്. ബസ് ഡ്രൈവര്‍ ഹരീന്ദ്രനാഥ്, യാത്രക്കാരായ സുഗുണന്‍, കെ.ആര്‍. മോനിച്ചന്‍ എന്നിവരുടെ മുഖത്തും ദേഹത്തുമാണ് പെട്രോള്‍ ഒഴിച്ചത്. സംഭവത്തെ തുടര്‍ന്ന് നാട്ടുകാര്‍ ലോറി തടയാന്‍ ശ്രമിച്ചു. ഇതിനിടെ ലോറി മറ്റൊരു ബൈക്കിലും തട്ടി. തുടര്‍ന്ന് പോലീസ് പിന്തുടര്‍ന്ന് ടിപ്പര്‍ ലോറി കസ്റ്റഡിയില്‍ എടുക്കുകയായിരുന്നു. ക്ലീനറെയും ലോറിക്കൊപ്പം തന്നെ പിടികൂടിയെങ്കിലും ഓടി രക്ഷപെട്ട ഡ്രൈവറെ പിന്നീടാണ് പിടികൂടിയത്.
പ്രതികരിക്കാൻ ഇവിടെ എഴുതുക: