അങ്കണവാടി ഗോഡൗണാക്കി; കുട്ടികള്‍ക്ക് അഭയം വരാന്ത

തകഴി: അങ്കണവാടിയിലെ ക്ലാസ് മുറി ഗോഡൗണാക്കി; പിഞ്ചുകുട്ടികള്‍ക്ക് പടിക്കാന്‍ വരാന്ത ആശ്രയം. തകഴി പഞ്ചായത്ത് ഓഫീസിന് മുന്നിലെ 106-ാം നമ്പര്‍ അങ്കണവാടി കെട്ടിടമാണ് ഗോഡൗണാക്കി മാറ്റിയത്. ചമ്പക്കുളം ബ്ലോക്കിന് കീഴിലെ 27ഓളം അങ്കണവാടികളില്‍ എത്തിക്കാനുള്ള അരി, പയര്‍, എണ്ണ തുടങ്ങിയ ഉത്പന്നങ്ങളാണ് പിഞ്ചുകുട്ടികളെ പുറത്താക്കി ക്ലാസ് മുറിയില്‍ സൂക്ഷിക്കുന്നത്. ഇതോടെ കുട്ടികളെ പഠിപ്പിക്കുന്നത് വരാന്തയിലായി. ക്ലാസ്മുറിയില്‍ സൂക്ഷിച്ചിരിക്കുന്ന അരിയും മറ്റും ചാക്കുകള്‍ പൊട്ടി തറയില്‍ വീണ നിലയിലാണ്. രക്ഷിതാക്കള്‍ പ്രതിഷേധവുമായി രംഗത്തെത്തിയിട്ടുണ്ട്.