കോട്ടയം: നഗരത്തിലെ ഹോട്ടലുകളില്‍ ഭക്ഷണവില പ്രദര്‍ശിപ്പിക്കണമെന്ന് ഹിന്ദു ഐക്യവേദി ആവശ്യപ്പെട്ടു. നഗരത്തിലെ ഹോട്ടലുകളില്‍ പലതിലും ശബരിമലയിലും പമ്പയിലുമുള്ളതിനേക്കാള്‍ കൂടിയ വിലയാണ് ഭക്ഷണസാധനങ്ങള്‍ക്ക് അയ്യപ്പഭക്തരില്‍ നിന്നും ഈടാക്കുന്നത്. ഇത് അയ്യപ്പഭക്തരോടുള്ള വെല്ലുവിളിയാണെന്ന് ഹിന്ദു ഐക്യവേദി ജില്ലാ കമ്മറ്റിയംഗം പൂഴിമേല്‍ രണരാജന്‍ പറഞ്ഞു.
ഭക്ഷണശാലകളില്‍ വിലവിവരം പ്രദര്‍ശിപ്പിക്കുന്നില്ലെന്ന് മാത്രമല്ല, വിലവിവരപ്പട്ടിക ആവശ്യപ്പെടുന്നവരോട് ഭീഷണിയുടെ സ്വരത്തില്‍ മറുപടി പറയുകയും ചെയ്യുന്നു. കോട്ടയം എഡിഎമ്മിന്റെ മദ്ധ്യസ്ഥതയില്‍ കൂടിയ ഭക്ഷണവില നിര്‍ണയ സമിതിയുടെ തീരുമാനം നടപ്പാക്കാത്ത ഹോട്ടലുടമകളുടെ സമീപനം അംഗീകരിക്കാനാവില്ല.
ഹോട്ടലുകളിലെ ഭക്ഷണവില വര്‍ദ്ധനവിനെതിരെ അധികൃതരെ സമീപിക്കുമെന്നും വിലവിവരപ്പട്ടിക പ്രദര്‍ശിപ്പിക്കാന്‍ ആവശ്യമായ നടപടി അധികൃതരുടെ ഭാഗത്തുനിന്നും ഉണ്ടാകണമെന്നും അദ്ദേഹം ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: