ചെങ്ങന്നൂര്‍: വെണ്മണിയില്‍ വീട് കയറി സ്ത്രീ അടക്കം മൂന്നു പേരെ ആക്രമിച്ച സംഭവത്തില്‍ രണ്ടുപേരെ വെണ്മണി പോലീസ് അറസ്റ്റ് ചെയ്തു. ചെറിയനാട് മാമ്പ്ര പാലനില്‍ക്കുന്നതില്‍ തറയില്‍ സജി (28), സനില്‍ (38) എന്നിവരെയാണ് എസ്‌ഐ: അനില്‍കുമാറിന്റെ നേതൃത്വത്തില്‍ അറസ്റ്റ് ചെയ്തത്.
ചൊവ്വാഴ്ച വൈകിട്ട് മൂന്നേകാലോടെയാണ് കേസിനാസ്പദമായ സംഭവം. വെണ്മണി വളയത്തില്‍ കോളനി പ്ലാന്തറ വീട്ടില്‍ ഗോപന്‍ (30), അച്ഛന്‍ ഗോപി, ഗോപന്റെ ഭാര്യ രജനി എന്നിവരെയാണ് അക്രമിച്ചത്. പ്രതികളും ഒപ്പമുണ്ടായിരുന്ന ഉണ്ണി, അഭിലാഷ്, പൂമൂടല്‍ സന്തോഷ്, പ്രാണി സന്തോഷ് എന്നിവരുള്‍പ്പെടുന്ന ആറംഗ സംഘം വീട്ടില്‍ അതിക്രമിച്ച് കടക്കുകയും കൈയ്യില്‍ കരുതിയ വടിവാള്‍, കമ്പിവടി എന്നിവകൊണ്ട് ഗോപനെ വെട്ടിപരിക്കേല്‍പ്പിക്കുകയായിരുന്നു. അക്രമണം തടയാന്‍ ശ്രമിക്കുന്നതിനിടെയാണ് ഗോപിക്കും, രജനിക്കും പരിക്കേറ്റത്.
ഗുരുതരമായി പരിക്കേറ്റ ഗോപനെ ആലപ്പുഴ വണ്ടാനം മെഡിക്കല്‍ കോളേജിലും ഗോപി, രജനി എന്നിവരെ മാവേലിക്കര ജില്ലാ ആശുപത്രിയിലും പ്രവേശിപ്പിച്ചിരിക്കുകയാണ്. വീട്ടിലുണ്ടായിരുന്ന ടിവി ഉള്‍പ്പടെയുള്ള ഗൃഹോപകരണങ്ങളും അക്രമിസംഘം തല്ലിത്തകര്‍ത്തു. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.
പ്രതികരിക്കാൻ ഇവിടെ എഴുതുക: