മാന്നാര്‍: ഓട്ടത്തിനിടെ ടയര്‍ പഞ്ചറായി നിയന്ത്രണം വിട്ട രണ്ടു കാറുകള്‍ വൈദ്യുത പോസ്റ്റുകള്‍ തകര്‍ത്തു. പ്രദേശത്ത് മണിക്കൂറുകളോളം വൈദ്യുതി മുടങ്ങി. മാന്നാര്‍-പുലിയൂര്‍ റോഡില്‍ കുരട്ടിക്കാട് വായനശാല ജങ്ഷനില്‍ ഞായറാഴ്ച രാവിലെ 9.30 നായിരുന്നു ആദ്യ അപകടം. മാന്നാറിലേക്ക് വരികയായിരുന്ന കാറിന്റെ പിന്നിലെ വലതു വശത്തെ ടയറാണ് പഞ്ചറായത്. ഇടതുവശത്തേക്ക് നിയന്ത്രണം വിടുകയായിരുന്നു. റോഡിന്റെ വശത്തു നിന്ന ട്രാന്‍സ്‌ഫോര്‍മറിന് അടുത്തുണ്ടായിരുന്ന വൈദ്യുത പോസ്റ്റില്‍ ഇടിച്ച ശേഷം സമീപത്തെ വീടിന്റെ മതിലില്‍ തകര്‍ത്താണ് കാര്‍ നിന്നത്.
ഇടിയുടെ ആഘാതത്തില്‍ കാര്‍ തിരികെ റോഡിലേക്ക് എത്തി. ഈ സമയം മറ്റു വാഹനങ്ങള്‍ വരാതിരുന്നതിനാല്‍ വന്‍ അപകടം ഒഴിവായി. സംസ്ഥാന പാതയില്‍ തിരുവല്ല-മാവേലിക്കര റോഡില്‍ മാന്നാര്‍ ഹോമിയോ ആശുപത്രിക്ക് വടക്കുവശം ഇന്നലെ ഉച്ചക്കായിരുന്നു രണ്ടാമത്തെ അപകടം. മാവേലിക്കര ഭാഗത്തേക്ക് പോയ കാറിന്റെ മുന്‍ഭാഗത്ത് ഇടതുവശത്തെ ടയര്‍ പഞ്ചറായി നിയന്ത്രണം വിട്ട് വൈദ്യുതി പോസ്റ്റില്‍ ഇടിക്കുകയായിരുന്നു. രണ്ടപകടങ്ങളിലും ആര്‍ക്കും പരിക്കേറ്റില്ല.
പ്രതികരിക്കാൻ ഇവിടെ എഴുതുക: