മെല്ബണ്: “ഞാന് മെഡിക്കല് ടൈം ഔട്ടുകളെ ആശ്രയിക്കില്ല”- അമേരിക്കന് ടീനെജ് സ്റ്റാര് സ്ലൊ യാനെ സ്റ്റീഫന്സിനെതിരായ സെമി ഫൈനലിനിടെ തുടര്ച്ചയായ അഞ്ചു മാച്ച് പോയിന്റുകള് മുതലാക്കാന് പരാജയപ്പെട്ടതിനു പിന്നാലെ ലോക ഒന്നാം നമ്പര് വിക്റ്റോറിയ അസാരെങ്ക ചികിത്സ തേടി കോര്ട്ട്വിട്ട വാര്ത്തയറിഞ്ഞ ന ലിയുടെ പ്രതികരണം ഇതായിരുന്നു. പക്ഷേ വിഖ്യാതമായ റോഡ് ലേവര് അരേനയില് വിധി ഐ ചൈനീസ് താരത്തിനു കാത്തുവച്ചതു മറ്റൊന്ന്. കന്നി ഓസ്ട്രേലിയന് ഓപ്പണ് വിജയം ലക്ഷ്യമിട്ടിറങ്ങിയ ന ലി പരുക്കിന്റെ എയ്സുകളെ തടുക്കാനാവാതെ ഇടറിവീണു. എതിരാളിയുടെ വിഹ്വലതകള് മുതലെടുത്ത അസാരെങ്ക കിരീടം നിലനിര്ത്തുകയെന്ന ദൗത്യം ഭംഗിയായി നിര്വഹിച്ചു (4-6, 6-4, 6-3). കഴിഞ്ഞ വര്ഷവും മെല്ബണ് പാ ര്ക്കിലെ റാണിയായ അസാരെങ്ക അ ങ്ങനെ ഇത്തവണയും അനിഷേധ്യതയുടെ പുതിയ അധ്യായം രചിച്ചു. ഇതോടെ ലോക ഒന്നാം നമ്പര് പദവിയും ചാമ്പ്യന്റെ കൈയില് ഭദ്രം.
സ്റ്റീഫന്സിനെതിരായ മത്സരത്തില് സ്പോര്ട്സ്മാന് സ്പിരിറ്റിനു ചേരാത്ത രീതിയില് പെരുമാറിയ അസാരെങ്കയ്ക്കു കലാശപ്പോരില് നേരിടേണ്ടിവന്നത് രണ്ട് എതിരാളികളെയായിരുന്നു. ആദ്യത്തെയാള് ന ലിയെങ്കില് രണ്ടാമത്തേതു ഗ്യാലറി തന്നെ. ബെലാറസ് താരം തോല്ക്കാന് തന്നെ മെല്ബണിലെ കാണികള് ആഗ്രഹിച്ചു. ന ലിയുടെ ഓരോ പോയിന്റിനെയും അവര് ഹര്ഷാരവത്തോടെ വരവേറ്റു; അസാരെങ്കയുടെതിനെ നിശബ്ദതയോടെയും.
ഗ്യാലറിയുടെ മനസറിഞ്ഞതു പോലെ ഒന്നാം സെറ്റില് ന ലി കളം നിറഞ്ഞു. മികച്ച ഷോട്ടുകളിലൂടെ എതിരാളിയെ സമ്മര്ദത്തിലാക്കിയ ചൈനീസ് താരം 6-4നു സെറ്റ് പോക്കറ്റിലാക്കി. എന്നാല് പിന്നെ മ ത്സരഗതി മാറി. രണ്ടാം സെറ്റില് അസാരെങ്ക 3-1നു ലീഡ് ചെയ്യവെ ന ലി കോര്ട്ടില് ഒന്നു വഴുതിവീണു.
ഇടതു കാല്ക്കുഴ തെറ്റിയ താരം വേദന കൊണ്ടു പുളഞ്ഞു. ചെറു ചികിത്സയ്ക്കുശേഷം തിരിച്ചെത്തിയ ന ലി 4-4നു എതിരാളിയെ ഒപ്പം പിടിച്ചു. എന്നാല് അവസാന രണ്ടു ഗെയിമുകള് ഉറപ്പിച്ച അസാരെങ്ക സെറ്റ് പിടിച്ചെടുത്ത് മത്സരത്തിലേക്കു മടങ്ങിയെത്തി.
നിര്ണായക മൂന്നാം സെറ്റില് ന ലിയുടെ നില കൂടുതല് സങ്കീര്ണം. 2-1നു മുന്തൂക്കം ഉറപ്പിക്കവെ മറ്റൊരു വീഴ്ച. പരുക്ക് കൂടുതല് വഴളായെങ്കിലും ബാന്ഡേജ് മുറുക്കിക്കെട്ടി ചെറു ചിരിയോടെ ന ലി കളിക്കാനെത്തി. എന്നാല് എതിരാളിയുടെ മൂന്നാം ഗെയിം ഭേദിച്ച അസാരെങ്ക ചാംപ്യന്ഷിപ്പ് പോയിന്റിലേക്ക് അധികം വിയര്പ്പൊഴുക്കാതെ കുതിച്ചു.
