മോസ്കോ: ഉയരങ്ങളുടെ രാജകുമാരി വിരമിക്കുന്നു. വനിതകളിലെ സെര്ജി ബൂബ്ക എന്നറിയപ്പെടുന്ന റഷ്യയുടെ പോള്വാള്ട്ട് സുന്ദരി യെലേന ഇസിന്ബയേവയാണ് ഫീല്ഡില് നിന്ന് പടിയിറങ്ങുന്നത്. അടുത്തമാസം നാട്ടില് നടക്കുന്ന ലോക അത്ലറ്റിക് ചാമ്പ്യന്ഷിപ്പിന് ശേഷം മത്സരരംഗം വിടാനാണ് ഇസിന്ബയേവയുടെ തീരുമാനം. മോസ്കോയിലെ ലുസ്നിക്കില് ലോക ചാമ്പ്യന്ഷിപ്പോടെ തന്റെ കരിയറിന് കര്ട്ടന് വീഴുമെന്ന് ഇന്നലെ ഇസിന്ബയേവ മാധ്യമങ്ങളോട് പറഞ്ഞു.
വളരെയേറെ സംഭവബഹുലമായ തന്റെ കരിയര് അത് ആരംഭിച്ചിടത്ത് തന്നെ അവസാനിപ്പിക്കാന് കഴിയുന്നതില് സന്തോഷമുണ്ടെന്നും തന്റെ ആരാധകരുടെയും സുഹൃത്തുക്കളുടെയും സാന്നിദ്ധ്യം അവസാന മത്സരത്തിലും പ്രതീക്ഷിക്കുന്നതായും ഇസിന് പറഞ്ഞു. വിജയിക്കാനുറച്ചു തന്നെയാണ് താന് മത്സരത്തിനിറങ്ങുന്നതെന്നും കഴിവിന്റെ പരമാവധി ശ്രമിക്കുമെന്നും റഷ്യന് മോഡലിംഗ് രംഗത്തെ സൂപ്പര്താരം കൂടിയായ ഇസിന് പറഞ്ഞു.
മികവിന്റെ കാര്യത്തില് പോള്വാള്ട്ട് ഇതിഹാസ താരം സെര്ജി ബുബ്കയുടെ പെണ്രൂപം എന്നാണ് ഇസിന്ബയേവയെ വിശേഷിപ്പിക്കാറ്. 2004, 2008 ഒളിമ്പിക്സുകളില് സ്വര്ണ്ണം നേടിയിട്ടുള്ള താരം 28 തവണ ലോക റെക്കോഡ് ഭേദിച്ചിട്ടുണ്ട്. ഇപ്പോഴത്തെ ഏറ്റവും മികച്ച ഉയരമായ 5.06 മീറ്ററും ഇസിന്റെ പേരില് തന്നെയാണ്.
