പാലക്കാട്: സമ്മാനമായി കിട്ടിയ കാര് വില്ക്കാമെന്നു വെച്ചാല് ആ പണവും മതിയാകില്ല ചിത്രയ്ക്ക് കായികമേളയില് പങ്കെടുക്കാന്. മലേഷ്യയില് നടക്കുന്ന ഏഷ്യന് സ്കൂള് കായികമേളയില് പങ്കെടുക്കണമെങ്കില് പി.യു. ചിത്രക്ക് ഏറെ കടമ്പകള് കടക്കാനുണ്ട്. ദേശീയ സ്കൂള്കായികമേളയില് സമ്മാനമായി കിട്ടിയ കാര് വില്ക്കാനൊരുങ്ങുകയാണ് കേരളത്തിന്റെ അഭിമാനമായ ഈ താരം. എന്നാലും കാര് വിറ്റുകിട്ടുന്ന തുക തികയില്ല എന്നതാണ് സത്യം. അല്ലെങ്കില് സര്ക്കാര് കനിയണം. സര്ക്കാരിന്റെ ഭാഗത്തുനിന്നോ സ്പോര്ട്സ് ഡിപ്പാര്ട്ട്മെന്റിന്റെ ഭാഗത്തുനിന്നോ ഒരു പിന്തുണയും സഹായവും ലഭിച്ചിട്ടില്ല എന്നതാണ് വാസ്തവം. ട്രയല്സില് വിജയിക്കുകയാണെങ്കില് കാര് വില്ക്കുകയല്ലാതെ വേറെ മാര്ഗമില്ലെന്ന് ചിത്ര വിഷമത്തോടെ പറയുന്നു. കേരള താരങ്ങള് ഇന്ന് പൂനെക്കു വണ്ടികയറുകയാണ്.
ദേശീയ സ്കൂള് കായിക മേളയില് മികച്ചപ്രകടനം കാഴ്ചവെച്ച അഫ്സലിനും ചിത്രക്കും സര്ക്കാര് ഒരു ലക്ഷം രൂപ നല്കുമെന്ന് പ്രഖ്യാപിച്ചിരുന്നെങ്കിലും മാസങ്ങള്കഴിഞ്ഞിട്ടും ആ തുക ലഭിച്ചിട്ടില്ല. യഥാക്രമം ഒന്നും രണ്ടും മൂന്നും സ്ഥാനം നേടുന്നവര്ക്ക് 30,000, 25,000, 20,000 രൂപ നല്കുമെന്ന ഡിപ്പാര്ട്ട്മെന്റിന്റെ വാഗ്ദാനവും നാമമാത്രമായി.
ഏഷ്യന് സ്കൂള് കായികമേളയില് പങ്കെടുക്കാനുള്ള താരങ്ങളെ കണ്ടെത്തുന്നതിനുള്ള ട്രയല്സ് അഞ്ച്, ആറ് തിയ്യതികള് പൂനെയില് നടക്കും. കേരളത്തില് നിന്ന് 28 പേര് യോഗ്യത നേടിയിട്ടുണ്ടെങ്കിലും 10 പേര് മാത്രമാണ് ട്രയല്സില് മത്സരിക്കുന്നത്. സ്വന്തം ചെലവിലാണ് ഇവര് ഇന്ന് പൂനെയിലേക്ക് വണ്ടികയറുന്നത്. പോകുവാനുള്ള സാമ്പത്തികമില്ലാത്തതിനാല് ബാക്കിയുള്ള താരങ്ങള് പിന്മാറുകയായിരുന്നു. മലേഷ്യയിലെ ക്വാലാലംപൂരില് സെപ്തംബര് 15 മുതല് 19 വരെയാണ് കായികമേള.
ഒരുലക്ഷം രൂപയുടെ ഡിഡി, പാസ്പോര്ട്ട് എന്നിവയുമായി വരാനാണ് സകൂള് ഗെയിംസ് ഫെഡറേഷന് അധികൃതരുടെ നിര്ദ്ദേശം. എന്നാല് ഇതൊന്നുമില്ലാതെ സര്ക്കാര് സഹായിക്കുമെന്ന പ്രതീക്ഷയിലാണ് താരങ്ങള് പൂനെയിലേക്ക് പോകുന്നത്. ഒരു ലക്ഷം രൂപ കെട്ടിവയ്ക്കുന്നതോടൊപ്പം മറ്റുചിലവിനുള്ള തുകയും കണ്ടെത്തണം. താരങ്ങളുടെ ചിലവ് അതാത് സംസ്ഥാനങ്ങള് വഹിക്കണമെന്നാവശ്യപ്പെട്ട് ഇവര് കത്തയച്ചിരുന്നു. എന്നാല് സര്ക്കാരിന്റെ ഭാഗത്തു നിന്ന് ഒരു മറുപടിയും ഇതുവരെ ലഭിച്ചിട്ടില്ല. ഫണ്ടില്ലെന്നു പറഞ്ഞ് ഡിപ്പാര്ട്ട്മെന്റും കയ്യൊഴിഞ്ഞു.
പരിശീലനം നല്കാനേ തങ്ങള്ക്കു കഴിയൂ, എന്നാല് സാമ്പത്തിക സഹായം നല്കാന് സര്ക്കാരിനെ പറ്റു എന്ന് കായികാധ്യാപകരായ സിജിന്മാഷും മനോജ് മാഷും വിഷമത്തോടെ പറഞ്ഞു. വിജയിച്ചു വരുമ്പോള് ലഡുവും മാലയുമിട്ട് സ്വീകരിക്കാന് മാത്രമേ എല്ലാവരും ഉണ്ടാകു, എന്നാല് അവരെ സഹായിക്കാന് ആരുമുണ്ടാവാറില്ലെന്നും അവര് പറഞ്ഞു. രാജ്യത്തിന് വേണ്ടി മത്സരിക്കുന്ന ഇവരുടെ ചിലവ് സര്ക്കാര് വഹിക്കുമെന്ന പ്രതീക്ഷയിലാണ് താരങ്ങളും.
സിജ പി.എസ്
