കൊച്ചി: കഴിഞ്ഞവര്ഷം അനന്തപുരിയില് ആഞ്ഞുവീശീയ പാലക്കാടന് കാറ്റിനെ ഇത്തവണ എറണാകുളത്ത് സ്വന്തം തട്ടകത്തില് പിടിച്ചുകെട്ടി. 57-ാമത് സംസ്ഥാന സ്കൂള് കായികമേളില് കഴിഞ്ഞ വര്ഷം കൈവിട്ടുപോയ ഓവറോള് കിരീടം എറണാകുളം തിരിച്ചുപിടിച്ചു. അവസാന ദിവസമായ ഇന്നലത്തെ 23 ഇനങ്ങളില് എട്ടെണ്ണത്തില് ലക്ഷ്യം കണ്ടാണ് അവര് വീണ്ടും കിരീടം മുടിയേറ്റിയത്.
28 സ്വര്ണ്ണവും 24 വെള്ളിയും 27 വെങ്കലവുമടക്കം 251 പോയിന്റ് എറണാകുളം സ്വന്തമാക്കിയപ്പോള് രണ്ടാം സ്ഥാനക്കാരായ പാലക്കാടിന് 27 സ്വര്ണ്ണവും 14 വെള്ളിയും 26 വെങ്കലവുമടക്കം 218 പോയിന്റുകള് നേടാനായി. എറണാകുളം കഴിഞ്ഞവര്ഷം നേടിയ സ്വര്ണ്ണം നിലനിര്ത്തിയപ്പോള് പാലക്കാടിന് ഒരെണ്ണം നഷ്ടമായി. മൂന്നാം സ്ഥാനം കഴിഞ്ഞവര്ഷത്തെപ്പോലെ ഇത്തവണയും കോഴിക്കോട് സ്വന്തമാക്കി. 11 സ്വര്ണ്ണവും 12 വെള്ളിയും ഒമ്പതു വെങ്കലവുമടക്കം 110പോയിന്റാണ് കോഴിക്കോട് നേടിയത്. ആറ് സ്വര്ണ്ണവും ഏഴുവീതം വെള്ളിയും വെങ്കലവുമടക്കം 68 പോയിന്റ് നേടിയ മലപ്പുറം നാലാം സ്ഥാനത്തെത്തിയപ്പോള് മുന് ചാമ്പ്യന്മാരായ കോട്ടയം ആറാം സ്ഥാനത്തേക്ക് പിന്തള്ളപ്പെട്ടു.
സ്കൂളുകളില് എറണാകുളം ജില്ലയിലെ കോതമംഗലം സെന്റ്ജോര്ജ് എച്ച്എസ്എസും മാര്ബേസില് എച്ച്എസ്എസും ഒന്നും രണ്ടും സ്ഥാനങ്ങള് സ്വന്തമാക്കി. കഴിഞ്ഞവര്ഷം 13 സ്വര്ണ്ണമടക്കം 111 പോയിന്റ് നേടിയ സെന്റ് ജോര്ജിന് 12 സ്വര്ണ്ണവും 10 വെള്ളിയും 11 വെങ്കലവുമടക്കം 100 പോയിന്റ്നേടാനേ കഴിഞ്ഞുള്ളൂ. ഒമ്പതു സ്വര്ണ്ണവും 10 വെള്ളിയും ആറു വെങ്കലവുമടക്കം 80 പോയിന്റ് നേടിയ മാര്ബേസില് എച്ച്എസ്എസ് രണ്ടാം സ്ഥാനവും ഒമ്പതു സ്വര്ണ്ണവും മൂന്ന് വെള്ളിയും ഒമ്പതു വെങ്കലവുമടക്കം 63 പോയിന്റ് നേടിയ പാലക്കാട് ജില്ലയിലെ കല്ലടി എച്ച്എസ്എസ് മൂന്നാം സ്ഥാനവും കരസ്ഥമാക്കി.
വിനോദ് ദാമോദരന്
