തമിഴ്‌ സൂപ്പര്‍ഹിറ്റ്‌ ചലച്ചിത്രം മൈനയിലൂടെ സനൂഷ കന്നഡയിലേക്ക്‌. തമിഴില്‍ പ്രഭു സോളമന്‍ സംവിധാനം ചെയ്ത്‌ മലയാളിയായ അമലാപോള്‍ അനശ്വരമാക്കിയ നായിക കഥാപാത്രത്തെയാണ്‌ സനൂഷ കന്നഡയില്‍ അവതരിപ്പിക്കുക. കന്നഡയിലേക്ക്‌ റീമേക്ക്‌ ചെയ്യപ്പെടുന്ന ചിത്രത്തിന്‌ ശൈലൂ എന്നാണ്‌ പേരിട്ടിരിക്കുന്നത്‌.
ദിലീപിന്റെ പുതിയ ചിത്രമായ മിസ്റ്റര്‍ മരുമകനിലും സനൂഷ തന്നെയാണ്‌ നായിക. ബാലതാരമായി അഭിനയ രംഗത്തെത്തിയ സനൂഷ നിരവധി സീരിയലുകളിലും സിനിമകളിലും മികച്ച വേഷങ്ങള്‍ അവതരിപ്പിച്ചിട്ടുണ്ട്‌. മൈനയിലെ അഭിനേതാക്കളുടെ പ്രകടനത്തെ ഏറെ ആദരവോടെയാണ്‌ കാണുന്നതെന്നും ചിത്രത്തിന്റെ റീമേക്കില്‍ നായികയാവാന്‍ അവസരം ലഭിച്ചതില്‍ സന്തുഷ്ടയാണെന്നും സനൂഷ അറിയിച്ചു.
കന്നഡയിലെ ഹിറ്റ്‌ മേക്കര്‍ എസ്‌. നാരായണ്‍ ആണ്‌ ശൈലു സംവിധാനം ചെയ്യുന്നത്‌. അമലാപോളിനെയാണ്‌ മൈനയെ കന്നഡത്തില്‍ അവതരിപ്പിക്കാന്‍ ആദ്യം സംവിധായകന്‍ ക്ഷണിച്ചിരുന്നതെങ്കിലും അമല ക്ഷണം നിരസിച്ചതിനെത്തുടര്‍ന്ന്‌ സനൂഷയെത്തേടി ഭാഗ്യം എത്തുകയായിരുന്നു.
ഈ മാസം 24 ന് ബംഗളൂരുവില്‍ ശൈലുവിന്റെ ചിത്രീകരണം ആരംഭിക്കുമെന്ന്‌ പ്രവര്‍ത്തകര്‍ അറിയിച്ചു. അതേസമയം, ചിത്രത്തിന്റെ തമിഴ്‌ സംവിധായകന്‍ പ്രഭുസോളമന്‍ മൈന ബോളിവുഡിലേക്കും റീമേക്ക്‌ ചെയ്യാന്‍ പദ്ധതിയിടുന്നുണ്ട്‌.
പ്രതികരിക്കാൻ ഇവിടെ എഴുതുക: