ചോറ്റാനിക്കര: ക്ഷേത്രവാദ്യകലാരംഗത്തെ നിറസാന്നിധ്യമായിരുന്ന മേളകലാരത്നം സദനം ദിവാകരമാരാര്ക്ക് ആസ്വാദക കേരളത്തിന്റെ ആദരാഞ്ജലികളോടെ യാത്രാമൊഴിയേകി. അന്തരിച്ച സദനത്തിന് അന്ത്യേപചാരം അര്പ്പിക്കാന് കുരീക്കാട് വസതിയില് നൂറുകണക്കിനാളുകളാണ് എത്തിയത്. വിവിധ ക്ഷേത്രസമിതികള്, സാംസ്ക്കാരിക സാമൂഹ്യ രാഷ്ട്രീയരംഗത്ത് പ്രവര്ത്തിക്കുന്നവരുള്പ്പെടെ വലിയ ജനാവലി എത്തിയിരുന്നു.
അന്നമനട പരമേശ്വരമാരാര്, പെരുവനം കുട്ടന്മാരാര്, ചേര്ത്തല തങ്കപ്പപണിക്കര്, കലാമണ്ഡലം ശങ്കരവാര്യര്, രാധാകൃഷ്ണന്, രാമന് നമ്പൂതിരി, സിനിമാതാരം ബാബു നമ്പൂതിരി, എ.ആര്. മോഹനന് തുടങ്ങിയവര് എത്തിയിരുന്നു. മുഖ്യമന്ത്രിക്കുവേണ്ടി ജില്ലാ കളക്ടര് രാജമാണിക്യം, സാംസ്ക്കാരിക വകുപ്പ് മന്ത്രിക്കുവേണ്ടി സംഗീത നാടക അക്കാദമി ഭാരവാഹി എന്നിവരും പുഷ്പചക്രം സമര്പ്പിച്ചു.
സദനത്തിന്റെ വസതിക്ക് സമീപത്തെ മൈതാനിയില് നടന്ന അനുശോചനയോഗത്തില് ഗ്രാമപഞ്ചായത്ത് പ്രസിഡന്റ് ജോണ്സണ് തോമസ് അധ്യക്ഷത വഹിച്ചു. മുന് എംഎല്എ എം.ജെ.ജേക്കബ്, എം.ആര്.എസ്. മേനോന്, എ.ആര്. മോഹനന്, പി. ശശി, എ.എ. മദനമോഹനന്, ചേര്ത്തല തങ്കപ്പപ്പണിക്കര്, ചോറ്റാനിക്കര സുരേന്ദ്രമാരാര്, ബേബി, എന്ട്രാക് മോഹനന്, പെരുവനം കുട്ടന്മാരാര്, കെ. കൊച്ചനിയന്, കല്യാണകൃഷ്ണന് തുടങ്ങിയവര് അനുശോചനയോഗത്തില് സംസാരിച്ചു. സംസ്ഥാന സര്ക്കാരിന്റെ ഔദ്യോഗിക ബഹുമതികളോടെ വീട്ടുവളപ്പില് സംസ്ക്കാരചടങ്ങുകള് നടന്നു.
