കൊച്ചി: സിലിണ്ടര് ട്രക്ക് ജീവനക്കാരുടെ സേവന വേതന വ്യവസ്ഥകള് സംബന്ധിച്ച തര്ക്കങ്ങള് ചര്ച്ച ചെയ്ത് പരിഹരിച്ചു. ഉദയംപേരൂര് ഐ.ഒ.സി, കരിമുകള് ബി.പി.സി.എല്, ചേരാളി ഐ.ഒ.സി, കഞ്ചിക്കോട് എച്ച്.പി.സി, ഇരുമ്പനം എച്ച്.പി.സി എന്നീ എല്.പി.ജി പ്ലാന്റുകളിലെ സിലിണ്ടര് ട്രക്ക് തൊഴിലാളികളുടെ സേവന വേതന വ്യവസ്ഥകള് ഒത്തുതീര്പ്പായതായി അഡീഷണല് ലേബര് കമ്മീഷണര് ഡോ. ജി.എല്. മുരളീധരന് അറിയിച്ചു. സേവന വേതന വ്യവസ്ഥകള് പരിഷ്കരിക്കണമെന്നാവശ്യപ്പെട്ട് നല്കിയ നിവേദനത്തിന്റ അടിസ്ഥാനത്തിലാണ് അഡീഷണല് ലേബര് കമ്മീഷണറുടെ അദ്ധ്യക്ഷതയില് ചര്ച്ച നടന്നത്.
ഒത്തുതീര്പ്പ് വ്യവസ്ഥപ്രകാരം 200 കി.മീ വരെയുള്ള ലോക്കല് ട്രിപ്പിന് ആദ്യവര്ഷം 675, രാണ്ടം വര്ഷം 725, മൂന്നാം വര്ഷം 825 രൂപ വീതം ലോറി കോണ്ട്രാക്ടര്മാര് ഡ്രൈവര്മാര്ക്ക് നല്കണം. 200 കിലോമീറ്ററിന് മുകളില് വരുന്ന ഓരോ കിലോമീറ്ററിനും ആദ്യവര്ഷം 3.25, രാണ്ടാമത്തെ വര്ഷം 3.50, മൂന്നാം വര്ഷം നാല് രൂപയും വര്ദ്ധനവ് ലഭിക്കും.
ടോറസ് ലോറിക്ക് ലോക്കല് (200 കി.മീ) ട്രിപ്പിന് ആദ്യവര്ഷം 910, തുടര്ന്ന് 980, 1115 രൂപ ക്രമത്തിലുമാണ്. 200 കി.മീ മുകളിലുള്ള ട്രിപ്പുകള്ക്ക് യഥാക്രമം 3.80, 4.10, 4.70 രൂപ ക്രമത്തില് ലഭിക്കും. ക്ലീനര്ക്ക് സാധാരണ വണ്ടികളില് ആദ്യവര്ഷം 350, തുടര്ന്നുള്ള വര്ഷങ്ങളില് യഥാക്രമം 375, 430 എന്നീ നിരക്കിലും ടോറസ് ലോറിയില് യഥാക്രമം 410, 440, 500 രൂപയും ലഭിക്കും.
ഡ്രൈവര്മാര്ക്ക് നടപ്പ് വര്ഷം 5000 രൂപയും 2015, 2016 വര്ഷങ്ങളില് യഥാക്രമം 5250, 5500 രൂപയും ക്ലീനര്ക്ക് യഥാക്രമം 2500, 2625, 2750 രൂപയും കരാര് ബോണസ് ലഭിക്കും. സംസ്ഥാനത്തെ എല്.പി.ജി ഗോഡൗണിലേക്ക് സിലിണ്ടറുമായി വരുന്ന ലോറികളിലെ ജീവനക്കാര്ക്കും ഇത് ബാധകമായിരികും. നടപ്പുവര്ഷം മുതല് മൂന്ന് വര്ഷത്തേക്ക് കരാര് ഉണ്ടാക്കിയിരിക്കുന്നത്. യോഗത്തില് ട്രക്ക് കോണ്ട്രാക്ടര് പ്രതിനിധികള്, തൊഴിലാളി യൂണിയന് പ്രതിനിധികള് എന്നിവര് പങ്കെടുത്തു.
