കൊച്ചി: ബിജെപി എറണാകുളം പാര്‍ലമെന്റ്‌ മണ്ഡലം സ്ഥാനാര്‍ത്ഥി എ.എന്‍.രാധാകൃഷ്ണന്‍ കൊച്ചി ബിഷപ്പ്‌ ഡോ. ജോസഫ്‌ കരിയലിനെ സന്ദര്‍ശിച്ചു. ഇന്നലെ രാവിലെ കണ്ണമാലി പള്ളിയങ്കണത്തിലാണ്‌ അദ്ദേഹം കൊച്ചി ബിഷപ്പിനെ കണ്ടത്‌. രാവിലെ പളളിയിലെത്തിയ അദ്ദേഹം കുര്‍ബാനയിലും അന്നദാനത്തിന്റെ ആശീര്‍വാദ ചടങ്ങിലും പങ്ക്‌ കൊണ്ടു. അതിന്‌ ശേഷം ചെറളായി, മട്ടാഞ്ചേരി ടിഡി ക്ഷേത്രം എന്നിവിടങ്ങള്‍ സന്ദര്‍ശിച്ചു. മട്ടാഞ്ചേരിയില്‍ വൃദ്ധജനങ്ങളെ താമസിപ്പിക്കുന്ന പകല്‍ വീടായ ശ്രീകരത്തില്‍ രാധാകൃഷ്ണന്‍ സന്ദര്‍ശനം നടത്തി. മട്ടാഞ്ചേരിയിലും പരിസര പ്രദേശങ്ങളിലുമുള്ള പഴയകാല ബിജെപി പ്രവര്‍ത്തകരെ കാണാനും സംസാരിക്കാനും സമയം കണ്ടെത്തിയ സ്ഥാനാര്‍ത്ഥി ചില മരണവീടുകളും സന്ദര്‍ശിച്ചു. പിന്നീട്‌ ഗൗതം ആശുപത്രിയിലെത്തിയ അദ്ദേഹം അവിടെ ചികല്‍സയില്‍ കഴിയുന്ന ബി ജെ പി പ്രവര്‍ത്തകരെ സന്ദര്‍ശിച്ച്‌ സുഖവിവരം അന്വേഷിച്ചു. കണ്ണമാലിയിലെ മംഗളാ എക്സ്പോര്‍ട്ട്‌ കമ്പനിയിലും, കമ്പനിയുടമയായ മംഗളാ ബാബുവിന്റെ വീട്ടിലും സമീപത്തുള്ള ക്ഷേത്രത്തിലുംസന്ദര്‍ശനം നടത്തി.
ബി ജെ പി കര്‍ഷക മോര്‍ച്ചാ ജില്ലാ പ്രസിഡന്റ്‌ പി ഡി സുജിത്ത്‌, മണ്ഡലം പ്രസിഡന്റ്‌ എന്‍ എസ് സുമേഷ്‌, മണ്ഡലം സെക്രട്ടറി പി ഡി പ്രവീണ്‍, ന്യുനപക്ഷമോര്‍ച്ചാ ജില്ലാ പ്രസിഡന്റ്‌ സി ഡി അഗസ്റ്റിന്‍ എന്നിവര്‍ സ്ഥാനാര്‍ത്ഥിയോടൊപ്പമുണ്ടായിരുന്നു.
