ബിജെപിയുടെ മുതിര്ന്ന നേതാവും രാജ്യസഭയിലെ പ്രതിപക്ഷ നേതാവുമായ അരുണ്ജെയ്റ്റ്ലിയുടെ വിശകലനം ജന്മഭൂമിയില്
ഒരു ബിരുദ പഠന വിദ്യാര്ത്ഥി എന്ന നിലയില് എന്റെ ജീവിതത്തിലെ ഏറ്റവും മികച്ചതെന്നു വിശേഷിപ്പിക്കാവുന്ന മൂന്നു വര്ഷക്കാലം ചെലവിട്ട എന്റെ പഴയ വിദ്യാഭ്യാസ സ്ഥാപനമായ ദല്ഹി ശ്രീറാം കൊമേഴ്സ് കോളേജ് കഴിഞ്ഞയാഴ്ച ഞാന് സന്ദര്ശിച്ചു. എഴുപതുകളുടെ ആദ്യകാലത്ത് ഞാന് അവിടെ ഒരു വിദ്യാര്ത്ഥിയായിരിക്കുമ്പോള് കോളേജ് വാണിജ്യപഠനത്തിന് പേരുകേട്ട ഒരു സ്ഥാപനമായിരുന്നു. ആ ഖ്യാതി സ്ഥാപനം ഇന്നും നിലനിര്ത്തുന്നു.
‘രാഷ്ട്രീയ വേരുകള് എന്ന പരിപാടിയുടെ ചിത്രീകരണവുമായി ബന്ധപ്പെട്ടാണ് ഞാന് സ്ഥാപനം സന്ദര്ശിച്ചത്. ബര്ഖാദത്ത് അവതാരകയായി എന്ഡി ടിവി എന്ന വാര്ത്താചാനല് നിര്മ്മിച്ച് സംപ്രേഷണം ചെയ്ത ഒരു പരിപാടിയായിരുന്നു അത്. 2010-ലെ കോമണ്വെല്ത്ത് മത്സരങ്ങള്ക്ക് ഒരു പരിശീലനകേന്ദ്രമായി കോളേജ് നിര്മ്മിച്ച സ്പോര്ട്സ് ജിംനേഷ്യത്തിലായിരുന്നു ചിത്രീകരണം നടന്നത്. നൂറോളം വരുന്ന വിദ്യാര്ത്ഥിസമൂഹം എനിക്കു നേരെ ചോദ്യശരങ്ങള് എയ്തു. വിദ്യാര്ത്ഥികളും ശ്രോതാക്കളും ഉന്നത നിലവാരം പുലര്ത്തി. മൊത്തത്തില് 96 ശതമാനം മാര്ക്ക് കരസ്ഥമാക്കുന്ന സ്ഥാപനങ്ങളില് നിന്നുള്ള ഏറ്റവും മിടുക്കരായ വിദ്യാര്ത്ഥികളായിരുന്നു ശ്രോതാക്കള് എന്ന് വ്യക്തമാക്കുന്നു. വളര്ന്നുകൊണ്ടിരിക്കുന്ന ആഗോളസാമ്പത്തികരംഗത്ത് സാമ്പത്തിക ഉപദേശകരായും മാനേജ്മെന്റ് ഉപദേശകരായും ചാര്ട്ടേഡ് അക്കൗണ്ടന്റുമാരായുമുള്ള മെച്ചപ്പെട്ട ഉദ്യോഗം കരസ്ഥമാക്കാന് വെമ്പല്കൊള്ളുകയായിരുന്നു അതിലേറെപ്പേരും.
രാഷ്ട്രീയ നേതൃത്വം, സാമ്പത്തികനയം, അഴിമതി, വിവിധ വര്ത്തമാനകാല സംഭവങ്ങള് എന്നീ വിഷയങ്ങളില് അധിഷ്ഠിതമായ ചോദ്യങ്ങളാണ് അവര് ഉന്നയിച്ചത്. പല കാര്യങ്ങളെക്കുറിച്ചും അവര്ക്കുണ്ടായിരുന്ന സംശയങ്ങള്ക്ക് ദൂരീകരണം തേടിയായിരുന്നു ചോദ്യങ്ങള്. എന്റെ പാര്ട്ടിയിലെ കുറ്റങ്ങളും കുറവുകളും ചികഞ്ഞെടുത്ത് എന്നെ ചോദ്യംചെയ്യാനും അവര് മടിച്ചില്ല. സംസ്കാരവും മര്യാദയും ഗൗരവവും നിറഞ്ഞുനിന്ന അന്തരീക്ഷത്തിലാണ് ചര്ച്ച അരങ്ങേറിയത്.
കാര്യങ്ങള് ശരിക്ക് പഠിക്കാതെ ഒരു അതിഥിക്ക് ഇതുപോലുള്ള സദസ്യരെ കൈകാര്യം ചെയ്യുക എളുപ്പമല്ല. പരിപാടിയുടെ ചിത്രീകരണശേഷം കോളേജില്നിന്ന് തിരിച്ചുപോയ വേളയില് എന്റെ മനസ്സില് രണ്ടു ചിന്തകള് കടന്നുവന്നു. ആ സമ്പുഷ്ടമായ സദസ്യരില് ഞാന് ദര്ശിച്ച അറിവിന്റെ ആഴവും ഗാംഭീര്യവും നിയമനിര്മ്മാണസഭകളില് പ്രതിഫലിക്കുമോ എന്നായിരുന്നു ആദ്യത്തെ ചിന്ത. പുതുതലമുറയുടെ നിലവാരം ഇത്ര മെച്ചപ്പെട്ടെങ്കില് നമ്മുടെ ഭാരതം ഭാവിയില് വളരെ നല്ലൊരു സ്ഥലമായി പരിണമിക്കും എന്നതായിരുന്നു രണ്ടാമത്തെ ചിന്ത.
