തിരുവനന്തപുരം: ഭാരതീയ സ്ത്രീസമൂഹത്തെ അപമാനിക്കുകയും പാകിസ്ഥാനി ചാരപ്രവര്‍ത്തകയെ നാലാം ഭാര്യയാക്കാന്‍ മൂന്നാം ഭാര്യയുടെ മരണത്തിനുത്തരവാദിയാകുകയും ചെയ്ത ശശി തരൂര്‍ ദേശീയ നാണക്കേടാണെന്ന്‌ മഹിളാ മോര്‍ച്ച സംസ്ഥാന അധ്യക്ഷ അഡ്വ. ഗീതാകുമാരി പറഞ്ഞു. ശശി തരൂരിനെതിരെ ഗാര്‍ഹിക പീഡനകേസെങ്കിലും ചുമത്തി അറസ്റ്റ്‌ ചെയ്യേണ്ട സമയം കഴിഞ്ഞു. കേന്ദ്രസര്‍ക്കാര്‍ ശശി തരൂരിനെ പുണ്യാളനായ്‌ ചിത്രീകരിച്ചു തുടങ്ങിയിരിക്കുകയാണെന്നും അവര്‍ പറഞ്ഞു.
മഹിളാ മോര്‍ച്ച ജില്ലാ കമ്മറ്റി ശശി തരൂരിന്റെ ഓഫീസിലേക്ക്‌ നടത്തിയ പ്രതിഷേധ ധര്‍ണ ഉദ്ഘാടനം ചെയ്യുകയായിരുന്നു അവര്‍. ശശിതരൂര്‍ ഐഎസ്‌ഐ ഏജന്റ്‌ മെഹര്‍ തരാറിന്റെ വലയില്‍ വീണെന്ന്‌ സുനന്ദ പുഷ്കര്‍ പറഞ്ഞതിനു പിന്നാലെയാണ്‌ അവരുടെ ദുരൂഹമരണം. ശശിതരൂര്‍ തെറ്റ്‌ ചെയ്തതുകൊണ്ടാണ്‌ അന്വേഷണത്തെ ഭയപ്പെട്ട്‌ കസേര ഒഴിയാത്തതെന്നും തരൂര്‍ രാജിവച്ച്‌ അന്വേഷണം നേരിടണമെന്നും അഡ്വ. ഗീതാകുമാരി ആവശ്യപ്പെട്ടു.
ഭാരതീയ സ്ത്രീത്വത്തിന്‌ കോണ്‍ഗ്രസ്‌ സര്‍ക്കാരിന്റെ കീഴില്‍ യാതൊരു സുരക്ഷിതത്വവും ഇല്ലെന്നും പാകിസ്ഥാനിയെ വിവാഹം ചെയ്യുന്നതിനുവേണ്ടി ഭാരതീയ സ്ത്രീത്വത്തെ നശിപ്പിച്ച തരൂരിന്‌ കാലം ഒരിക്കലും മാപ്പ്‌ നല്‍കില്ലെന്നും ബിജെപി ജില്ലാ പ്രസിഡന്റ്‌ അഡ്വ. സുരേഷ്‌ പറഞ്ഞു.
മഹിളാമോര്‍ച്ചയുടെ സഹോദരിമാര്‍ ജില്ല മുഴുവന്‍ ചാണകം തളിച്ച്‌ ശുദ്ധമാക്കിയെന്നും രാജിവയ്‌ക്കാതെ ഇനി തരൂര്‍ തിരുവനന്തപുരത്ത്‌ കാലുകുത്തിയാല്‍ പ്രതീകാത്മകമായ്‌ നടത്തിയ ചെരുപ്പ്‌ മാലയിടലും ചാണകം തളിക്കലും ചൂലിനടിയുമെല്ലാം നേരിട്ടനുഭവിക്കേണ്ടിവരുമെന്നും സുരേഷ്‌ മുന്നറിയിപ്പ് നല്‍കി. ബിജെപി ജില്ലാ ആഫീസില്‍ നിന്ന്‌ ചെരുപ്പ്‌ മാലയണിച്ച തരൂരിന്റെ കോലവുമായി നീങ്ങിയ നൂറുകണക്കിന്‌ മഹിളാമോര്‍ച്ച പ്രവര്‍ത്തകര്‍ കടന്നുപോയ വീഥികളില്‍ ചാണകം തളിച്ചും കോലത്തില്‍ ചൂലും ചെരുപ്പും കൊണ്ടടിച്ചുമാണ്‌ പ്രതിഷേധിച്ചത്‌. സ്റ്റാച്യുവിന്‌ സമീപത്തെ ഓഫീസിനു മുന്നില്‍ വച്ച്‌ വന്‍ പോലീസ്‌ സംഘം പ്രവര്‍ത്തകരെ തടഞ്ഞു. തുടര്‍ന്ന്‌ പ്രവര്‍ത്തകര്‍ തരൂരിന്റെ കോലം കത്തിച്ചു.
മഹിളാമോര്‍ച്ച ജില്ലാ പ്രസിഡന്റ്‌ സിമി ജ്യോതിഷ്‌, ബിജെപി നേതാക്കളായ, ചെമ്പഴന്തി ഉദയന്‍, വെള്ളാഞ്ചിറ സോമശേഖരന്‍, മഹിളാമോര്‍ച്ചാ നേതാക്കളായ പ്രീതാ ശ്രീകുമാര്‍, ഡി വിജയകുമാരി, ഗീതാ ബാബു, ശ്രീകുമാരിയമ്മ, ഗിരിജ അജിത്‌, ശ്രീജ സുജര്‍ശന്‍, ഹേമലത ലാലി എന്‍, ബിന്ദു എം എന്നിവര്‍ സംബന്ധിച്ചു.
പ്രതികരിക്കാൻ ഇവിടെ എഴുതുക: