പാമ്പാടി: വനിതാ പഞ്ചായത്തംഗത്തെ അപമാനിക്കാന് ശ്രമിച്ച അതേ പഞ്ചായത്തിലെ തന്നെ അംഗത്തിനെതിരെ നല്കിയ പരാതിയില് നടപടിയുണ്ടാകാത്തതില് പ്രതിഷേധിച്ച് പഞ്ചായത്ത് പ്രസിഡന്റിന്റെ വീട്ടിലേക്ക് ബിജെപി പ്രവര്ത്തകര് മാര്ച്ച് നടത്തി. കൂരോപ്പട ഗ്രാമപഞ്ചായത്ത് മെമ്പര് ദീപാസുമേഷിനെ അപമാനിക്കാന് ശ്രമിച്ച് പി.ബി.ദിലീപ്കുമാറിനെതിരെ കോട്ടയം ജില്ലാ പൊലീസ് സൂപ്രണ്ടിനും വനിതാ കമ്മീഷനും ദീപ പരാതി നല്കിയിരുന്നു. എന്നാല് പ്രതിയും ഇടതുപക്ഷക്കാരനുമായ അംഗത്തെ പഞ്ചായത്തിലെ ഭരണകക്ഷിയായ കോണ്ഗ്രസിലെ ചില അംഗങ്ങളും നേതാക്കളും ചേര്ന്ന് സംരക്ഷിക്കുകയാണ്. പരാതിക്കാരിക്ക് നീതിലഭിക്കുംവരെ സമരപരിപാടികള് തുടരുമെന്ന് ബിജെപി നേതാക്കള് അറിയിച്ചു. പ്രതിയുടെ അറസ്റ്റ് ഇനിയും വൈകിയാല് ജില്ലാ കമ്മറ്റിയുടെ നേതൃത്വത്തില് ശക്തമായ പ്രക്ഷോഭം ആരംഭിക്കുമെന്നും നേതാക്കള് പറഞ്ഞു.
കൂരോപ്പട പഞ്ചായത്ത് പ്രസിഡന്റ് സന്ധ്യാ സുരേഷിന്റെ വീട്ടിലേക്ക് മാര്ച്ച് ചെയ്തെത്തിയ ബിജെപി, യുവമോര്ച്ച പ്രവര്ത്തകരെ വീടിനുസമീപം പൊലീസ് തടഞ്ഞു. തുടര്ന്ന് വഴിയില് കുത്തിയിരിപ്പ് സമരം നടത്തി തങ്ങളുടെ പ്രതിഷേധമറിയിച്ചു. ബിജെപി പുതുപ്പള്ളി മണ്ഡലം പ്രസിഡന്റ് നീറിക്കാട് കൃഷ്ണകുമാര്, സെക്രട്ടറി ഹരിപ്രസാദ്, ഭാരവാഹികളായ രാധാകൃഷ്ണന്, രാജേന്ദ്രന്, കെ.എസ്.ഗോപകുമാര്, രാജേഷ് തുടങ്ങിയവര് പ്രസംഗിച്ചു.
പ്രതികരിക്കാൻ ഇവിടെ എഴുതുക: