ന്യൂദല്ഹി: പി.സി.ചാക്കോയുടെ നേതൃത്വത്തിലുള്ള ജെപിസി തയ്യാറാക്കിയ ടു ജി സ്പെക്ട്രം റിപ്പോര്ട്ടിനെതിരെ പാര്ലമെന്ററി സമിതിയിലെ ബിജെപി അംഗങ്ങള് ലോക്സഭാ സ്പീക്കര് മീരാ കുമാറിന് വിയോജനക്കുറിപ്പു നല്കി. പി.സി ചാക്കോയുടെ ഏകപക്ഷീയമായ, പരസ്പര വിരുദ്ധമായ കാര്യങ്ങള് എഴുതിച്ചേര്ത്ത, നിരവധി പോരായ്മകളുള്ള ജെപിസി റിപ്പോര്ട്ട് അംഗീകരിക്കാനാവില്ലെന്ന് ജെപിസിയിലെ ബിജെപി അംഗങ്ങള് പത്രസമ്മേളനത്തില് വ്യക്തമാക്കി. ചെയര്മാനെ വിശ്വാസമില്ലാത്തതിനാലാണ് സ്പീക്കര്ക്ക് നേരിട്ടു കുറിപ്പു നല്കുന്നതെന്ന് അവര് വിശദീകരിച്ചു.
കേന്ദ്രസര്ക്കാര് നിയന്ത്രണത്തിനു സമ്പൂര്ണ്ണ വിധേയനായി പ്രവര്ത്തിച്ച പി.സി. ചാക്കോ പാര്ലമെന്ററി സമിതിയുടെ വിശ്വാസ്യത കളഞ്ഞുകുളിച്ചതായും ബിജെപി കുറ്റപ്പെടുത്തി. പ്രധാനമന്ത്രി മന്മോഹന്സിങ്ങിനേയും ധനമന്ത്രിയേയും വിളിച്ചുവരുത്തണമെന്ന ജെപിസി അംഗങ്ങളുടെ നിരന്തര ആവശ്യം അംഗീകരിക്കാതെ അവരെ സംരക്ഷിക്കാനാണ് ചെയര്മാന് ശ്രമിച്ചത്.
പ്രധാനമന്ത്രി മന്മോഹന്സിങ്ങിനേയും ധനമന്ത്രി പി.ചിദംബരത്തേയും രക്ഷിക്കുന്നതിനു കവചം തീര്ത്ത റിപ്പോര്ട്ടാണ് ചാക്കോ തയ്യാറാക്കിയതെന്ന് ജെപിസിയിലെ മുതിര്ന്ന അംഗവും മുന് ധനമന്ത്രിയുമായ യശ്വന്ത് സിന്ഹ പറഞ്ഞു. പ്രതിപക്ഷ അംഗങ്ങളുടെ വിയോജനക്കുറിപ്പ് ചെയര്മാനു നല്കിയാല് അതില് തിരുത്തല് വരുത്തുമെന്നതിനാലാണ് ലോക്സഭാ സ്പീക്കര്ക്ക് നേരിട്ടു നല്കിയതെന്നും അദ്ദേഹം പറഞ്ഞു. അത്ര ഏകപക്ഷീയമായും ധിക്കാരപരവുമായാണ് പി.സി.ചാക്കോ പ്രവര്ത്തിച്ചത്. ബോഫോഴ്സ് കേസ് അന്വേഷിക്കുന്നതിനു രൂപീകരിച്ച ജെപിസിക്കു ശേഷം ഇത്ര നിയമവിരുദ്ധമായും ഏകപക്ഷീയമായും പ്രവര്ത്തിച്ചത് പി.സി. ചാക്കോയുടെ ടു ജി സ്പെക്ട്രം അന്വേഷിച്ച ജെപിസിയാണെന്ന് യശ്വന്ത് സിന്ഹ കുറ്റപ്പെടുത്തി.
ജെപിസിക്കു മുന്നിലേക്കു വിളിച്ചു വരത്തപ്പെട്ട സിഎജി വിനോദ് റായിയെ കുറ്റവാളിയോടെന്നവണ്ണമാണ് ജെപിസി ചെയര്മാന് ചാക്കോയും മറ്റു കോണ്ഗ്രസ് അംഗങ്ങളും ചോദ്യം ചെയ്യാന് ശ്രമിച്ചത്. ഇരിക്കാന് കസേര പോലും നല്കാന് തയ്യാറാവാതിരുന്നതു ബിജെപി അംഗം ജസ്വന്ത് സിംഗ് തടയുകയായിരുന്നു.
സ്വന്തം ലേഖകന്
