ആലപ്പുഴ: വാഹനാപകടത്തില്‍ പരിക്കേറ്റ്‌ റോഡില്‍ക്കിടന്നിരുന്ന രണ്ട്‌ യുവാക്കളെ ട്രാന്‍സ്പോര്‍ട്ട്‌ കമ്മിഷണര്‍ ഋഷിരാജ്‌ സിങ്‌ ഔദ്യോഗിക വാഹനത്തില്‍ ആശുപത്രിയില്‍ എത്തിച്ചു. അടിയന്തര ചികിത്സകളും പരിശോധനകളും നടത്തി പരിക്കേറ്റവരെ കോട്ടയം മെഡിക്കല്‍ കോളേജ് ആശുപത്രിയിലും മറ്റുള്ളവരെ മാറ്റുന്നത്‌ വരെ രണ്ട്‌ മണിക്കൂര്‍ അദ്ദേഹം ആശുപത്രിയില്‍ ചെലവഴച്ചു.
അപകടത്തില്‍ പരിക്കേറ്റ മായിത്തറ സുബീഷ്‌ ഭവനത്തില്‍ സുബീഷ്‌ (28), പാറേവെളിച്ചിറ സുജിത്‌ (25) എന്നിവരെയാണ്‌ ഋഷിരാജ്‌ സിങ്‌ കെവിഎം ആശുപത്രിയില്‍ എത്തിച്ചത്‌. പിന്നീട്‌ ഇവരെ കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. ഇന്നലെ ഉച്ചയ്ക്ക് രണ്ടിന്‌ ദേശിയപാതയില്‍ സെന്റ്‌ മൈക്കിള്‍സ്‌ കോളേജിന്‌ മുന്നിലായിരുന്നു അപകടം.
കുട്ടനാട്‌ ജോയിന്റ്‌ ആര്‍ടിഒ ഓഫീസ്‌ ഉദ്ഘാടന ചടങ്ങില്‍ പങ്കെടുത്ത്‌ എറണാകുളത്ത്‌ പോകുമ്പോഴായിരുന്നു അപകടം കണ്ടത്‌. ഒരു കാല്‍നട യാത്രക്കാരന്റെ സഹായത്തോടെയാണ്‌ റോഡില്‍ക്കിടന്നവരെ തന്റെ വാഹനത്തില്‍ കയറ്റി ആശുപത്രിയില്‍ കൊണ്ടുപോയത്‌. യുവാക്കള്‍ സഞ്ചരിച്ച ബൈക്ക്‌ ലോറിയെ മറികടക്കുന്നതിനിടെ തെന്നി വീഴുകയായിരുന്നു. മാരാരിക്കുളം സിഐ: കെ.സുഭാഷ്‌, ചേര്‍ത്തല എംവിഐ: ടോജോ, എഎംവി: ബേബി ജോണ്‍ എന്നിവരും ആശുപത്രിയിലെത്തിയിരുന്നു.
പ്രതികരിക്കാൻ ഇവിടെ എഴുതുക: