ചടയമംഗലം: കോദണ്ഡരാമ ക്ഷേത്രവും കവാടവും തകര്‍ത്ത പ്രതികളെ അറസ്റ്റ്‌ ചെയ്യാന്‍ തയ്യാറാകാത്ത പോലീസ്‌ നടപടിക്കെതിരെ ഭാരതീയ ജനതാ പാര്‍ട്ടി നിയോജക മണ്ഡലം സമിതിയുടെ ആഭിമുഖ്യത്തില്‍ ഇന്ന് രാവിലെ 11ന്‌ ചടയമംഗലം പോലീസ്‌ സ്റ്റേഷന്‍ മാര്‍ച്ച്‌ ബിജെപി ദേശീയ സമിതി അംഗം ശോഭാസുരേന്ദ്രന്‍ ഉദ്ഘാടനം ചെയ്യും. കഴിഞ്ഞ 18നാണ്‌ എംസി റോഡിന്‌ സമീപമുള്ള പ്രവേശന കവാടവും പാറമുകളിലെ കാണിക്ക വഞ്ചിയും സാമൂഹ്യ വിരുദ്ധന്മാര്‍ നശിപ്പിച്ചത്‌. ഇതിനെതിരെ വ്യാപകമായി ഹര്‍ത്താല്‍ ഉള്‍പ്പടെയുള്ള പ്രതിഷേധ പരിപാടികള്‍ സംഘടിപ്പിച്ചിരുന്നു. ഈ സംഭവത്തില്‍ സംശയമുള്ള പ്രതികളുടെ വിവരങ്ങള്‍ നാട്ടുകാര്‍ പോലീസിന്‌ കൈമാറിയിട്ടും ഫലമൊന്നും ഉണ്ടയില്ലെന്നും, പോലീസ്‌ നായയെ കൊണ്ടുള്ള അന്വേഷണം പ്രഹസനം മാത്രമായിരുന്നുവെന്നും പത്ര സമ്മേളനത്തില്‍ മണ്ഡലം ഭാരവാഹികള്‍ കുറ്റപ്പെടുത്തി.
നിലമേല്‍ കൈതോട്‌ ഉള്ള കാവ്‌ നശിപ്പിക്കുവാനും വിഗ്രഹങ്ങള്‍ എടുത്തുമാറ്റുകയും ചെയ്ത സംഘടിത ശ്രമം പോലീസ്‌ കണ്ടില്ലന്ന്‌ നടിക്കുന്നു. പൂജ പോലും പോലീസ്‌ സംരക്ഷണത്തില്‍ നടത്തേണ്ട അവസ്ഥയിലാണ്‌. നിലമേല്‍ കൈതോട്‌ മഹാദേവര്‍ ക്ഷേത്രത്തിനോടനുബന്ധിച്ചുള്ള നാഗര്‍ കാവില്‍ ശുദ്ധികലശവും ആയില്യം പൂജയും തടയാനുള്ള ശ്രമം ഹിന്ദുസംഘടനകളുടെ ഇടപെടലിനെത്തുടര്‍ന്ന്‌ പരാജയപ്പെടുകയായിരുന്നു. കഴിഞ്ഞ ദിവസം ക്ഷേത്ര ഭരണസമിതിയും പൂജാരിയും എത്തിയപ്പോഴാണ്‌ മുസ്ലീം വിഭാഗത്തില്‍പ്പെട്ട നൂറ്റിയമ്പതോളം ആളുകളാണ്‌ സംഘടിച്ചെത്തി പൂജ തടയാന്‍ ശ്രമിച്ചത്‌.
മഹാദേവര്‍ ക്ഷേത്രത്തോടനുബന്ധിച്ചുള്ള പരമ്പരാഗതമായി പൂജ നടന്നുവന്ന നാഗര്‍ കാവിനോട്‌ ചേര്‍ന്ന്‌ ചട്ടങ്ങള്‍ ലംഘിച്ചുകൊണ്ട്‌ തൈക്കാവും മൂത്രപ്പുരകളും നിര്‍മ്മിച്ചത്‌ കളക്ടര്‍ നേരത്തെ തടഞ്ഞിരുന്നു. കാവ്‌ ഭൂമിയില്‍ മലമൂത്ര വിസര്‍ജ്ജ്യങ്ങള്‍ ഒഴുക്കാനുള്ള ശ്രമത്തിനെതിരെ വന്‍ ജനരോഷം ഉയര്‍ന്നിരുന്നു.
പുനലൂര്‍ ഡിവൈഎസ്പിയുടെ മധ്യസ്ഥതയില്‍ ഇരുവിഭാഗങ്ങളുമായി ചര്‍ച്ച നടത്തിയിരുന്നു. ഇതിനിടയിലാണ്‌ നാഗര്‍ കാവിലെ വിഗ്രഹങ്ങള്‍ നശിപ്പിച്ചത്‌. നാഗര്‍ കാവിലെ പൂജ തടസപ്പെടുത്തി ഭൂമി കൈയ്യേറാനും സ്വന്തമാക്കാനുമുള്ള മതമൗലികവാദികളുടെ ശ്രമമാണ്‌ നിയമപോരാട്ടത്തിലൂടെ ക്ഷേത്ര ഭരണസമിതി തകര്‍ത്തത്‌. ശുദ്ധികലശവും പൂജയും നടത്താന്‍ കഴിഞ്ഞ ആയില്യം ദിവസം എത്തിയവരെ തടയാന്‍ പ്രദേശത്തെ മതമൗലികവാദ സംഘടനയില്‍പ്പെട്ട ആളുകളുടെ നേതൃത്വത്തില്‍ വന്‍ സംഘം എത്തിയത്‌ സ്ഥലത്ത്‌ സംഘര്‍ഷാവസ്ഥ സൃഷ്ടിച്ചു.
ചെറിയ വെളിനല്ലൂര്‍ ആയിരവില്ലിക്കാവ്‌ കയ്യേറുവാനും നശിപ്പിക്കുവാനും ഉള്ള ശ്രമം നടന്നിരുന്നു. ഭാരത സംസ്കാര പ്രതീകമായ കാവുകളും ക്ഷേത്രങ്ങളും നശിപ്പിക്കുവാന്‍ നടത്തുന്ന നീക്കത്തില്‍ പ്രതിക്ഷേതിച്ചുകൊണ്ട്‌ സാമൂഹ്യ വിരുദ്ധന്മാരെ അറസ്റ്റ്‌ ചെയ്യണമെന്ന്‌ ആവശ്യപ്പെട്ടുകൊണ്ടാണ്‌ ബിജെപി പോലീസ്‌ സ്റ്റേഷന്‍മാര്‍ച്ച്‌ നടത്തുന്നത്‌.
ബി. സുരേന്ദ്രന്റെ അദ്ധ്യക്ഷതയില്‍ കൂടിയയോഗം മണ്ഡലം പ്രസിഡന്റ്‌ എം.ആര്‍. സുരേഷ്‌, സംസ്ഥാന കൗണ്‍സില്‍ മെമ്പര്‍ എസ്‌. വിജയന്‍, പുത്തയം ബിജു, കരിങ്ങന്നൂര്‍ മനോജ്‌, മധുസൂദനന്‍ പിള്ള, അനില്‍ കുമാര്‍ തുടങ്ങിയവര്‍ പത്രസമ്മേളനത്തില്‍ സംസാരിച്ചു.
പ്രതികരിക്കാൻ ഇവിടെ എഴുതുക: