സിംഗപ്പൂര്: അണ്ടര് 23 എമേര്ജിംഗ് ടീംസ് കാപ്പില് ഇന്ത്യന് യുവനിരക്ക് ഞെട്ടിക്കുന്ന തോല്വി. ദുര്ബലരായ അഫ്ഗാനിസ്ഥാനാണ് ഇന്ത്യയെ അട്ടിമറിച്ചത്. 28 റണ്സിനാണ് അഫ്ഗാന് വിജയം. ആദ്യം ബാറ്റ് ചെയ്ത അഫ്ഗാനിസ്ഥാന് 50 ഓവറില് 7 വിക്കറ്റ് നഷ്ടത്തില് 184 റണ്സെടുത്തു. മറുപടിബാറ്റിങ്ങിനിറങ്ങിയ ഇന്ത്യക്ക് 9 വിക്കറ്റ് നഷ്ടത്തില് 156 റണ്സെടുക്കാനേ കഴിഞ്ഞുള്ളൂ. 43 റണ്സെടുത്ത് പുറത്താകാതെ നിന്ന സമിയുള്ളയാണ് അഫ്ഗാന് നിരയിലെ ടോപ് സ്കോറര്. ഇന്ത്യന് നിരയില് 51 റണ്സെടുത്ത ലോകേഷ് രാഹുലും 39 റണ്സെടുത്ത അങ്കിത് ഭവാനെയുമാണ് മികച്ച പ്രകടനം നടത്തിയത്. പരാജയപ്പെട്ടെങ്കിലും ഇന്ത്യ സെമിഫൈനലില് പ്രവേശിച്ചു. ഇന്ന് നടക്കുന്ന സെമിയില് യുഎഇയാണ് ഇന്ത്യയുടെ എതിരാളികള്.
നേരത്തെ ടോസ് നേടിയ ഇന്ത്യ അഫ്ഗാനിസ്ഥാനെ ബാറ്റിംഗിനയച്ചു. ഒന്നാം വിക്കറ്റില് കരിം സാദിഖും മുഹമ്മദ് ഷഹ്സാദും ചേര്ന്ന് 53 റണ്സ് കൂട്ടിച്ചേര്ത്തു. 25 റണ്സെടുത്ത കരിം സാദിഖിനെ മെനേരിയ വിക്കറ്റിന് മുന്നില് കുടുക്കി. പിന്നീടെത്തിയ ഹഷ്മത്തുള്ള ഷെയ്ദി 11 റണ്സെടുത്ത അപരാജിത്തിന്റെ പന്തില് ക്യാപ്റ്റന് സൂര്യകുമാര് യാദവ് പിടികൂടി. സ്കോര് 2ന് 76. ഒരു റണ്സ് കൂടി സ്കോര്ബോര്ഡില് കൂട്ടിച്ചേര്ത്തപ്പോഴേക്കും മൂന്നാം വിക്കറ്റും അഫ്ഗാന് നഷ്ടമായി. 38 റണ്സെടുത്ത മുഹമ്മദ് ഷഹ്സാദിനെ അപരാജിത്തിന്റെ പന്തില് അക്ഷര് പട്ടേല് കയ്യിലൊതുക്കി. സ്കോര് 93-ല് എത്തിയപ്പോള് നാല് റണ്സെടുത്ത നവ്റോസ് മംഗലിനെ പട്ടേല് സ്വന്തം പന്തില് പിടികൂടി. തുടര്ന്നെത്തിയവരില് മുഹമ്മദ് നബി 25 റണ്സും സമിയുള്ള പുറത്താകാതെ 43 റണ്സുമെടുത്തു. ഇന്ത്യക്ക് വേണ്ടി അക്ഷര് പട്ടേലും അപരാജിത്തും രണ്ട് വിക്കറ്റുകള് വീതം വീഴ്ത്തി. മലയാളി താരം സന്ദീപ് വാര്യര്ക്ക് വിക്കറ്റൊന്നും ലഭിച്ചില്ല.
185 റണ്സ് വിജയലക്ഷ്യത്തെ പിന്തുടര്ന്ന ഇന്ത്യക്ക് മികച്ച തുടക്കം നല്കാന് ഓപ്പണര്മാര്ക്ക് കഴിഞ്ഞില്ല. സ്കോര്ബോര്ഡില് 35 റണ്സ് മാത്രമുള്ളപ്പോള് ആദ്യ വിക്കറ്റ് ഇന്ത്യക്ക് നഷ്ടമായി. 10 റണ്സെടുത്ത ഉന്മുക്ത് ചന്ദിനെ ഹംസ ഹൊടാക് മുഹമ്മദ് ഷഹ്സാദിന്റെ കൈകളിലെത്തിച്ചു. നാല് റണ്സ് കൂടി കൂട്ടിച്ചേര്ത്തപ്പോഴേക്കും രണ്ടാം വിക്കറ്റും വീണ. രണ്ട് റണ്സെടുത്ത അപരാജിത് റണ്ണൗട്ടായി മടങ്ങി. പിന്നീട് അശോക് മെനേരിയയും ലോകേഷ് രാഹുലും ചേര്ന്ന് സ്കോര് 70-ല് എത്തിച്ചു. എന്നാല് 5 റണ്സെടുത്ത മെനേരിയയെ മുഹമ്മദ് നബി ബൗള്ഡാക്കി. സ്കോര് 82 റണ്സിലെത്തിയപ്പോള് ഇന്ത്യന് ഇന്നിംഗ്സിലെ ടോപ്സ്കോറര് രാഹുലും മടങ്ങി. 51 റണ്സെടുത്ത ലോകേഷിനെ രഹ്മത്ത് ഷാ ഹംസ ഹൊടക്കിന്റെ കൈകളിലെത്തിച്ചു. ഇതോടെ ഇന്ത്യയുടെ തകര്ച്ച ഏറെക്കുറെ പൂര്ണമായി. പിന്നീടെത്തിയവരില് 39 റണ്സെടുത്ത അങ്കിത് ഭാവനെയും 15 റണ്സെടുത്ത ക്യാപ്റ്റന് സൂര്യകുമാര് യാദവും 13 റണ്സെടുത്ത സന്ദീപ് ശര്മ്മയും മാത്രമാണ് അല്പമെങ്കിലും പൊരുതാന് ശ്രമിച്ചത്. മൂന്ന് വിക്കറ്റ് വീഴ്ത്തിയ മുഹമ്മദ് നബിയും രണ്ട് വിക്കറ്റ് വീഴ്ത്തിയ റഹ്മത്ത് ഷായുമാണ് ഇന്ത്യയെ തകര്ത്തത്.
പ്രതികരിക്കാൻ ഇവിടെ എഴുതുക: