കോട്ടയം: പ്രതിഷേധം ഭയന്ന് റംസാന് ഓണം സഹകണ വിപണി ജില്ലാതല ഉദ്ഘാടന ചടങ്ങ് ആഭ്യന്തരമന്ത്രി തിരുവഞ്ചൂര് രാധാകൃഷ്ണന് ഒഴിവാക്കി. സഹകരണ വകുപ്പിന്റെ നേതൃത്വത്തില് കണ്സ്യൂമര് ഫെഡ് മുഖേന കെഡബ്ലൂസിസിഎസ് മൈതാനിയില് ആരംഭിച്ച റംസാന് ഓണം സഹകരണ വിപണി ജില്ലാതല ഉദ്ഘാടനം ആഭ്യന്തരമന്ത്രിയായിരുന്നു നിര്വ്വഹിക്കേണ്ടിയിരുന്നത്. എന്നാല് 4.30ന് നടക്കേണ്ട ഉദ്ഘാടന ചടങ്ങിന് മണിക്കൂറുകള് കാത്തിരുന്നിട്ടും മന്ത്രി എത്തിയില്ല. കനത്ത പോലീസ് സന്നാഹം ഒരുക്കയിരുന്നെങ്കിലും പ്രതിഷേധം ഭയന്ന് മന്ത്രി പരിപാടി ഉപേക്ഷിക്കുകയായിരുന്നു. കൊല്ലത്ത് പ്രതിഷേധക്കാരെ പൊലീസ് തല്ലിച്ചതച്ചതിനെത്തുടര്ന്ന് ഉദ്ഘാടന ചടങ്ങില് മന്ത്രിയെത്തിയാല് കനത്ത പ്രതിഷേധമുയര്ത്താന് രാപ്പകല് സമരക്കാര് തീരുമാനിച്ചിരുന്നു. രാപ്പകല് സമരം നടത്തുന്ന പന്തലിനു സമീപത്തായിരുന്നു ഉദ്ഘാടനവേദിയും. ആഭ്യന്തരമന്ത്രിക്ക് സുരക്ഷിത പാതയൊരുക്കാന് എത്തിയ പൊലീസ് ഇടയ്ക്ക് പ്രതിഷധക്കാരുമായി ഇടയുകയും ചെയ്തു. കൂടുതല് പൊലീസ് സ്ഥലത്തെത്തിയെങ്കിലും മന്ത്രി ഉദ്ഘാടനച്ചടങ്ങിനെത്തിയില്ല. പിന്നീട് നഗരസഭാ ചെയര്മാന് എം.പി.സന്തോഷ്കുമാറാണ് ഉദ്ഘാടനം നിര്വ്വഹിച്ചത്.
പ്രതികരിക്കാൻ ഇവിടെ എഴുതുക: