കോട്ടയം: പാഠപുസ്തകങ്ങള് സര്ക്കാര് പ്രസുകളില് അച്ചടിക്കുന്നതിന് നടപടികള് സ്വീകരിക്കുമെന്ന് മന്ത്രി കെ.പി. മോഹനന് പറഞ്ഞു. 2015 മുതല് പരമാവധി പാഠപുസ്തകങ്ങള് സര്ക്കാര് പ്രസുകളില് അച്ചടിക്കുന്നതിന് സാഹചര്യം ഒരുക്കുമെന്ന് അദ്ദേഹം വ്യക്തമാക്കി. വാഴൂര് ഗവണ്മെന്റ് പ്രസിലെ ഫോര് കളര് വെബ് ഓഫ്സെറ്റ് മെഷീന് ഉദ്ഘാടനം ചെയ്യുകയായിരുന്നു മന്ത്രി.
ആധുനികവത്ക്കരണം നടപ്പാക്കുന്നതിനുള്ള കാലതാമസവും സമയബന്ധിതമായി ജോലികള് തീര്ക്കാന് കഴിയാത്തതുമാണ് സര്ക്കാര് പ്രസുകള്ക്ക് വിനയാകുന്നത്. 1,53,35,000 രൂപ വിലവരുന്ന നൂതന ഫോര് കളര് വെബ് ഓഫ്സെറ്റ് മെഷീന് വരുന്നതോടെ വാഴൂര് ഗവണ്മെന്റ് പ്രസ് ബുക്ക് പ്രിന്റിംഗില് സ്വയംപര്യാപ്തമാകുമെന്നും അദ്ദേഹം കൂട്ടിച്ചേര്ത്തു.
സര്ക്കാര് പ്രസ് ആരംഭിച്ചതിന്റെ 175-ാം വാര്ഷികം ഈ വര്ഷം ആഘോഷിക്കും. ഇതോടനുബന്ധിച്ച് അച്ചടിയുടെ ചരിത്രം വിശദമാക്കുന്ന മ്യൂസിയം സ്ഥാപിക്കും. കൂടാതെ സര്ക്കാര് പ്രസുകളുടെ ഉന്നമനത്തിനായി അഞ്ചുകോടി രൂപ മാറ്റിവച്ചിട്ടുണ്ട്-മന്ത്രി പറഞ്ഞു. അന്തരിച്ച മുന്മന്ത്രി കെ. നാരായണക്കുറുപ്പിനെ ചടങ്ങില് അനുസ്മരിച്ചു.
ചടങ്ങില് ഡോ. എന്. ജയരാജ് എം.എല്.എ അധ്യക്ഷനായിരുന്നു. ആന്റോ ആന്റണി എം.പി, അച്ചടി വകുപ്പ് ഡയറക്ടര് എന്. സുനില്കുമാര്, കോട്ടയം ജില്ലാ പഞ്ചായത്തംഗം ടി.കെ. സുരേഷ് കുമാര്, വാഴൂര് ബ്ലോക്ക് പഞ്ചായത്തംഗം കെ.റ്റി. മുകുന്ദന്, ഗവണ്മെന്റ് പ്രസുകളുടെ സൂപ്രണ്ട് കെ.പി. മണിലാല്, മുന് എം.എല്.എ കാനം രാജേന്ദ്രന് തുടങ്ങിയവര് പങ്കെടുത്തു.
പ്രതികരിക്കാൻ ഇവിടെ എഴുതുക: