കോട്ടയം: സാമ്പത്തിക സെന്സസ് സംബന്ധിച്ച് പൊതുജനങ്ങളുടെ തെറ്റിധാരണകള് ദൂരീകരിച്ച്, സത്യസന്ധമായ വിവരങ്ങള് രേഖപ്പെടുത്താന് എന്യുമറേറ്റര്മാരും സൂപ്പര്വൈസര്മാരും ശ്രദ്ധിക്കണമെന്ന് ജില്ലാ കളക്ടര് മിനി ആന്റണി നിര്ദേശിച്ചു. ആറാമത് സാമ്പത്തിക സെന്സസ് സൂപ്പര്വൈസര്മാര്ക്കുള്ള ജില്ലാതല പരിശീലന പരിപാടി ഉദ്ഘാടനംചെയ്തു സംസാരിക്കുകയായിരുന്നു കളക്ടര്.
സാമ്പത്തിക സെന്സസ് ജില്ലയിലെ സാമ്പത്തിക ക്രയവിക്രയങ്ങള് നടത്തുന്ന സംരംഭങ്ങളുടെയും വ്യക്തികളുടെയും കണക്കെടുപ്പാണെന്ന് മനസ്സിലാക്കാത്തവര് ഇപ്പോഴും ഏറെയാണെന്ന് കളക്ടര് ചൂണ്ടിക്കാട്ടി. ഈ തെറ്റിധാരണമൂലം പലപ്പോഴും പൊതുജനങ്ങള് ശരിയായ വിവരങ്ങള് നല്കാത്ത അവസ്ഥയുണ്ടാവാറുണ്ട്. പൊതുജനങ്ങളുടെ ഇത്തരം തെറ്റിധാരണകള് മാറ്റാന്തക്ക പരിശീലനം എന്യുമറേറ്റര്മാര്ക്ക് ലഭിക്കണം. സെന്സസ് സംബന്ധിച്ച് പത്രങ്ങളിലും ദൃശ്യ, ശ്രവ്യ മാധ്യമങ്ങളിലും വ്യാപക പ്രചരണം നല്കണം. ജനസംഖ്യാ കണക്കെടുപ്പും പൊതുതെരഞ്ഞെടുപ്പും പോലെ രാജ്യമാകമാനം പങ്കാളികളാകുന്ന ബൃഹത് സംരംഭമാണ് സാമ്പത്തിക സെന്സസ്. – കളക്ടര് പറഞ്ഞു.
മെയ് ഒന്നിന് ആരംഭിച്ച് ഒന്നര മാസത്തിനുള്ളില് സമയബന്ധിതമായി സെന്സസ് ജോലികള് പൂര്ത്തീകരിക്കേതുണ്ടെന്ന് ചടങ്ങില് അധ്യക്ഷത വഹിച്ച ഇക്കണോമിക്സ് ആന്റ് സ്റ്റാറ്റിസ്റ്റിക്സ് വകുപ്പ് ജില്ലാ ഡെപ്യൂട്ടി ഡയറക്ടര് സുനില് അഗസ്റ്റിന് പറഞ്ഞു. സൂപ്പര്വൈസര്മാരുടെ പരിശീലനത്തിനു പുറമെ അതത് സ്ഥലങ്ങളില് സൂപ്പര്വൈസര്മാരുടെ മേല്നോട്ടത്തില് എന്യുമറേറ്റര്മാര്ക്ക് പരിശീലനം നല്കുമെന്നും അദ്ദേഹം അറിയിച്ചു.
ഡെപ്യൂട്ടി ഡയറക്ടര് കെ.വിമലന്, ജില്ലാ ഇന്ഫര്മേഷന് ഓഫീസര് എസ്.ആര്.പ്രവീണ് എന്നിവര് ആശംസകളര്പ്പിച്ചു. ഇക്കണോമിക്സ് ആന്റ് സ്റ്റാറ്റിസ്റ്റിക്സ് കോട്ടയം ജില്ലാ ഓഫീസര് എം.ജെ.ലൂയിസ് സ്വാഗതവും അഡീഷണല് ജില്ലാ ഓഫീസര് പി.പി.പത്മനാഭന്നായര് നന്ദിയും പറഞ്ഞു.
തുടര്ന്നു നടന്ന ടെക്നിക്കല് സെഷനില് ഡെപ്യൂട്ടി ഡയറക്ടര്മാരായ കെ.വിമലന്, സുനില് അഗസ്റ്റിന്, റിസര്ച്ച് ഓഫീസര് എം.കെ.ശ്യാംനാഥ് എന്നിവര് ക്ലാസെടുത്തു. താലൂക്ക് സ്റ്റാറ്റിസ്റ്റിക്കല് ഓഫീസര്മാരുടെ യോഗവും ഇതോടനുബന്ധിച്ച് നടന്നു. ഏകദിന പരിശീലന പരിപാടിയില് ജില്ലയിലെ സ്റ്റാറ്റിസ്റ്റിക്കല് വകുപ്പിലെ മുഴുവന് ജീവനക്കാരും പങ്കെടുത്തു.
പ്രതികരിക്കാൻ ഇവിടെ എഴുതുക: