ചെന്നൈ: അഴിമതി ആരോപണത്തില്‍ മുങ്ങിക്കുളിച്ച കേന്ദ്ര ആഭ്യന്തരമന്ത്രി പി.ചിദംബരത്തിന്‌ പ്രധാനമന്ത്രി മന്‍മോഹന്‍സിംഗിന്റെ മുക്തകണ്ഠ പ്രശംസ.
ധനമന്ത്രി, പിന്നീട്‌ ആഭ്യന്തരമന്ത്രി തുടങ്ങിയ നിലകളില്‍ ചിദംബരത്തിന്റെ പ്രബുദ്ധമായ നേതൃപാടവം തനിക്ക്‌ ഏറെ പിന്തുണയും പ്രചോദനവുമാണെന്ന്‌ ചിദംബരത്തിന്റെ ശിവഗംഗാ മണ്ഡലത്തില്‍ അളഗപ്പ സര്‍വകലാശാലയുടെ ഒരു പരിപാടിയില്‍ പ്രധാനമന്ത്രി പറഞ്ഞു. എന്തൊക്കെ ദൗത്യം ഏല്‍പ്പിച്ചാലും അതെല്ലാം മാതൃകാപരമായി ചിദംബരം നിര്‍വഹിക്കുമെന്നും മന്‍മോഹന്‍ അവകാശപ്പെട്ടു.
2ജി സ്പെക്ട്രം അഴിമതിയില്‍ ചിദംബരത്തിന്മേല്‍ നിയമത്തിന്റെ പിടി മുറുകിവരുന്നതിനിടെയാണ്‌ മന്‍മോഹന്റെ അഭിപ്രായപ്രകടനം. മുല്ലപ്പെരിയാര്‍ പ്രശ്നത്തില്‍ കേരളത്തിനെതിരെ ചിദംബരം നടത്തിയ ചില അഭിപ്രായ പ്രകടനങ്ങള്‍ വന്‍ വിവാദം ക്ഷണിച്ചുവരുത്തിയിരുന്നു. പ്രമുഖ കോണ്‍ഗ്രസ്‌ നേതാക്കള്‍ തന്നെ ചിദംബരത്തിന്റെ രാജി ആവശ്യപ്പെടുകയും ചെയ്തു.
എല്ലാംകൊണ്ടും ചിദംബരത്തിന്റെ നില പരുങ്ങലിലായ സാഹചര്യത്തിലാണ്‌ പുതിയ അടവുമായി മന്‍മോഹന്‍സിംഗ്‌ ശിവഗംഗയിലെത്തിയതെന്ന്‌ കരുതുന്നു. ദല്‍ഹിയിലെ ഒരു വന്‍ ഹോട്ടല്‍ വ്യവസായിയെ സഹായിക്കാന്‍ ഔദ്യോഗിക പദവി ദുരുപയോഗിച്ചുവെന്ന ആരോപണവും ചിദംബരം നേരിടുന്നുണ്ട്‌.
സ്പെക്ട്രം അഴിമതിയില്‍ ചിദംബരത്തിന്റെ പങ്ക്‌ വ്യക്തമായതോടെ അദ്ദേഹത്തിന്റെ രാജിക്കായി ബിജെപി കടുത്ത സമ്മര്‍ദ്ദം തുടരുകയുമാണ്‌. ഇതിനിടയില്‍ മുല്ലപ്പെരിയാര്‍ പ്രശ്നത്തിന്റെ പേരിലുള്ള വിവാദ പരാമര്‍ശം കൂടിയായതോടെ ഒരു വിഭാഗം കോണ്‍ഗ്രസ്‌ നേതാക്കളും ചിദംബരത്തിനെതിരെ തിരിഞ്ഞ സാഹചര്യത്തിലാണ്‌ പ്രധാനമന്ത്രി നേരിട്ട്‌ രക്ഷകന്റെ രൂപത്തില്‍ എത്തിയിരിക്കുന്നത്‌.
നേരത്തെ, ചെന്നൈയില്‍ ഗണിതശാസ്ത്ര പ്രതിഭയായിരുന്ന ശ്രീനിവാസ രാമാനുജന്റെ 125-ാ‍ം ജന്മവാര്‍ഷിക ചടങ്ങിലും മന്‍മോഹന്‍സിംഗ്‌ പങ്കെടുത്തു. രാമാനുജനോടുള്ള ആദരസൂചകമായി 2012 ദേശീയ ഗണിതശാസ്ത്ര വര്‍ഷമായി പ്രഖ്യാപിച്ചു. രാമാനുജന്റെ ജന്മദിനമായ ഡിസംബര്‍ 22 ദേശീയ ഗണിതശാസ്ത്ര ദിനമായും പ്രധാനമന്ത്രി പ്രഖ്യാപിച്ചിട്ടുണ്ട്‌.
പ്രതികരിക്കാൻ ഇവിടെ എഴുതുക: