ലഖ്‌നൗ : ആവർത്തിച്ച് സമൻസ് അയച്ചിട്ടും ഹാജരാകാത്തതിനെ തുടർന്ന് കോൺഗ്രസ് നേതാവ് രാഹുലിന് ലഖ്‌നൗവിലെ അഡീഷണൽ ചീഫ് ജുഡീഷ്യൽ മജിസ്‌ട്രേറ്റ് (എസിജെഎം) കോടതി ബുധനാഴ്ച 200 രൂപ പിഴ ചുമത്തി. ഏപ്രിൽ 14 ന് രാഹുൽ ഗാന്ധി കോടതിയിൽ ഹാജരായില്ലെങ്കിൽ കർശന നടപടി സ്വീകരിക്കുമെന്നും മുന്നറിയിപ്പ് നൽകിയിട്ടുണ്ട്.
കോടതിയിലെ വാദം കേൾക്കലിനിടെ പരാതിക്കാരനായ നൃപേന്ദ്ര പാണ്ഡെയുടെ അഭിഭാഷകൻ രാഹുലിനെതിരെ ആഞ്ഞടിച്ചു. ആവർത്തിച്ച് സമൻസ് അയച്ചിട്ടും രാഹുൽ ഗാന്ധി കോടതിയിൽ ഹാജരാകുന്നില്ലെന്ന് അദ്ദേഹം പറഞ്ഞു. ഇത്തരമൊരു സാഹചര്യത്തിൽ കോടതി അദ്ദേഹത്തിനെതിരെ കർശന നടപടി സ്വീകരിക്കണമെന്നും രാഹുലിന് വേണ്ടി സമർപ്പിച്ച ഹാജർ ഒഴിവാക്കൽ അപേക്ഷയെയും അഭിഭാഷകൻ എതിർത്തു.
മറുവശത്ത് കോടതിയിൽ ഹാജരാകുന്നതിൽ നിന്ന് ഒഴിവാക്കണമെന്ന് ആവശ്യപ്പെട്ട് പ്രതിഭാഗം അഭിഭാഷകൻ പ്രാൻഷു അഗർവാൾ സമർപ്പിച്ച ഹർജിയിൽ രാഹുൽ ഗാന്ധി നിലവിൽ പാർലമെന്റിൽ പ്രതിപക്ഷ നേതാവാണെന്ന് പറഞ്ഞു. മാർച്ച് 5 ന് അദ്ദേഹം ഒരു വിദേശ വിശിഷ്ട വ്യക്തിയുമായി മുൻകൂട്ടി ഷെഡ്യൂൾ ചെയ്ത ഒരു കൂടിക്കാഴ്ച നടത്തി. ഇതിനുപുറമെ മറ്റ് ഔദ്യോഗിക ജോലികളിലെ തിരക്കുകൾ കാരണം അദ്ദേഹത്തിന് കോടതിയിൽ ഹാജരാകാൻ കഴിഞ്ഞില്ല എന്ന് പറഞ്ഞു. കൂടാതെ കോടതി ഉത്തരവുകളെ അദ്ദേഹം മാനിക്കുന്നുവെന്നും കോടതിയിൽ ഹാജരാകുന്നത് മനഃപൂർവ്വം ഒഴിവാക്കാൻ ശ്രമിക്കുന്നില്ലെന്നും വ്യക്തമാക്കി.
എന്നാൽ ഇതിൽ കോടതി അതൃപ്തി പ്രകടിപ്പിക്കുകയും രാഹുൽ ഗാന്ധിക്ക് 200 രൂപ പിഴ ചുമത്തുകയും ചെയ്തു. എന്ത് വില കൊടുത്തും ഏപ്രിൽ 14 ന് കോടതിയിൽ ഹാജരാകണമെന്ന് മുന്നറിയിപ്പും നൽകി. അടുത്ത ഹിയറിങ്ങിലും രാഹുൽ ഹാജരാകാതിരുന്നാൽ അദ്ദേഹത്തിനെതിരെ ജാമ്യമില്ലാ വാറണ്ട് പുറപ്പെടുവിക്കുമെന്നും കോടതി വ്യക്തമാക്കി.
2022 ഡിസംബർ 17 ന് മഹാരാഷ്‌ട്രയിലെ അകോളയിൽ നടന്ന ഒരു പത്രസമ്മേളനത്തിൽ സ്വാതന്ത്ര്യസമര സേനാനി വീർ സവർക്കറിനെക്കുറിച്ച് രാഹുൽ അധിക്ഷേപകരമായ പരാമർശങ്ങൾ നടത്തിയിരുന്നു. ഇത് പിന്നീട് പരാതിയായി കോടതിയിൽ എത്തുകയായിരുന്നു. ഈ കേസിൽ പരാതിക്കാരനായ നൃപേന്ദ്ര പാണ്ഡെ ലഖ്‌നൗ കോടതിയിലാണ് പരാതി നൽകിയത്. തുടർന്നാണ് മാർച്ച് 5 ന് രാഹുലിനോട് കോടതിയിൽ ഹാജരാകാൻ സമൻസ് പുറപ്പെടുവിച്ചത്.
പ്രതികരിക്കാൻ ഇവിടെ എഴുതുക: