സ്പ്ലിറ്റ്: യുവേഫ നേഷന്‍സ് ലീഗില്‍ സ്വന്തം തട്ടകത്തില്‍ കരുത്തരായ പോര്‍ച്ചുഗലിനെ നേരിട്ട ക്രൊയേഷ്യയ്‌ക്ക് സമനില. ഇരു ടീമുകളും ഓരോ ഗോള്‍ നേടിയാണ് സമനില പാലിച്ചത്. സൂപ്പര്‍ താരം ക്രിസ്റ്റ്യാനോ റൊണാള്‍ഡോ കളിച്ചില്ല.
കളിയുടെ ആദ്യ പകുതിയില്‍ ഏകപക്ഷീയമായ ഒരു ഗോളിന് മുന്നിട്ടു നിന്നത് പോര്‍ച്ചുഗലാണ്. 33-ാം മിനിറ്റില്‍ ജോവോ ഫെലിക്‌സ് നേടിയ ഗോളില്‍. ഇതിനെതിരെ ക്രൊയേഷ്യയ്‌ക്കായി സൂപ്പര്‍ പ്രതിരോധ താരം ജോസ്‌കോ ഗ്വാര്‍ഡിയോള്‍ 65-ാം മിനിറ്റില്‍ ഗോള്‍ മടക്കി.
സമനിലയോടെ ഗ്രൂപ്പില്‍ 14 പോയിന്റുള്ള പോര്‍ച്ചുഗലിന് പിന്നില്‍ ക്രോട്ടുകള്‍ രണ്ടാമതുണ്ട്. എട്ട് പോയിന്റ് നേടിയിട്ടുള്ള അവര്‍ക്ക് പിന്നില്‍ സ്‌കോട്ട്‌ലന്‍ഡും(ഏഴ് പോയിന്റ്).
ഇന്നലെ നടന്ന മററൊരു പോരാട്ടത്തില്‍ പോളണ്ടിനെ സ്‌കോട്ട്‌ലന്‍ഡ് തോല്‍പ്പിച്ചു.
ഒന്നിനെതിരെ രണ്ട് ഗോളുകള്‍ക്കാണ് സ്‌കോട്ടിഷ് വിജയം. കളിയുടെ തുടക്കത്തില്‍ മൂന്നാം മിനിറ്റിലും അവസാനിക്കുന്നതിന് തൊട്ടുമുമ്പ് ഇന്‍ജുറി ടൈമിലും ആണ് സ്‌കോട്ട് പട ഗോളുകള്‍ നേടിയത്. രണ്ടാം പകുതിയുടെ 59-ാം മിനിറ്റിലായിരുന്നു പോളിഷ് ഗോള്‍.
പ്രതികരിക്കാൻ ഇവിടെ എഴുതുക: