തിരുവനന്തപുരം: തെളിമ പദ്ധതിയിലൂടെ റേഷന്‍ കാര്‍ഡിലെ തെറ്റുകള്‍ സൗജന്യമായി തിരുത്താനുള്ള അവസരം പൊതുജനങ്ങള്‍ പരമാവധി പ്രയോജനപ്പെടുത്തണമെന്ന് ഭക്ഷ്യ,പൊതുവിതരണ വകുപ്പ് മന്ത്രി ജി ആര്‍ അനില്‍ പറഞ്ഞു. റേഷന്‍ കാര്‍ഡുകള്‍ കുറ്റമറ്റതാക്കുകയെന്ന ലക്ഷ്യത്തോടെ നടപ്പിലാക്കുന്ന തെളിമ പദ്ധതിയുടെ സംസ്ഥാനതല ഉദ്ഘാടനം മണക്കാട് നിര്‍വഹിക്കുകയായിരുന്നു മന്ത്രി.
നവംബര്‍ 15 മുതല്‍ ഡിസംബര്‍ 15 വരെ റേഷന്‍ കാര്‍ഡിലെ തെറ്റുകള്‍ തിരുത്താനും ആധാര്‍ നമ്പര്‍ ചേര്‍ക്കാനും പൊതുജനങ്ങള്‍ക്ക് അവസരമുണ്ട്. 96 ലക്ഷം കുടുംബങ്ങള്‍ക്ക് തെളിമ പദ്ധതി പ്രയോജനപ്പെടും. ഉടമയുടെയും അംഗങ്ങളുടെയും പേര്, വയസ്, മേല്‍വിലാസം കാര്‍ഡുടമയുമായുള്ള ബന്ധം തുടങ്ങിയ വിവരങ്ങളിലെ തെറ്റുകള്‍ തിരുത്താം. സംസ്ഥാനത്തെ എല്ലാ റേഷന്‍ കടകളിലും സ്ഥാപിച്ചിട്ടുള്ള പെട്ടികളില്‍ ആവശ്യമായ രേഖകള്‍ക്കൊപ്പം അപേക്ഷകള്‍ നിക്ഷേപിച്ചാല്‍ മതി. അപേക്ഷകള്‍ കൃത്യമായി പരിശോധിച്ചു തെറ്റുകള്‍ തിരുത്തി കാര്‍ഡ് നല്‍കും. എല്‍പിജി, വൈദ്യുതി കണക്ഷന്‍ വിവരങ്ങള്‍ കാര്‍ഡില്‍ ചേര്‍ക്കാം. അനര്‍ഹമായി കൈവശം വച്ചിരിക്കുന്ന മുന്‍ഗണനാ / എ എ വൈ കാര്‍ഡുകളെക്കുറിച്ചുള്ള പരാതികളും ഈ രീതിയില്‍ നല്‍കാമെന്ന് മന്ത്രി അറിയിച്ചു.
പ്രതികരിക്കാൻ ഇവിടെ എഴുതുക: