കൊച്ചി:ഒഡിഷ സ്വദേശിനിയെ ബലാത്സംഗം ചെയ്‌തെന്ന കേസിലെ പ്രതി ശിവപ്രസാദിനായി പൊലീസ് ലുക്ക് ഔട്ട് സര്‍ക്കുലര്‍ ഇറക്കി. 75 വയസുളള ഇയാള്‍ 26 ദിവസമായി ഒളിവിലാണ്.
പ്രതിയുടെ മുന്‍കൂര്‍ ജാമ്യാപേക്ഷ എറണാകുളം ജില്ല സെഷന്‍സ് കോടതി കഴിഞ്ഞയാഴ്ച തള്ളി. 22 വയസുള്ള ഒഡീഷ സ്വദേശിനി വീട്ടുജോലിക്കാരിയെ പ്രതി മദ്യം നല്‍കി ബലാത്സംഗം ചെയ്‌തെന്നാണ് കേസ്.
ശിവപ്രസാദ്, ഹോര്‍ട്ടികോര്‍പ്പ്, ഫിഷറീസ്, പ്ലാന്റേഷന്‍ കോര്‍പ്പറേഷന്‍ എംഡി അടക്കം നിരവധി സര്‍ക്കാര്‍ പൊതുമേഖലാ സ്ഥാപനങ്ങളില്‍ ഉന്നത പദവിയിലിരുന്ന വ്യക്തിയാണ്. അയല്‍ സംസ്ഥാനങ്ങളിലും ഇയാള്‍ക്കായി പൊലീസ് തെരച്ചില്‍ നടത്തി. പ്രത്യേക അന്വേഷണസംഘത്തെ രൂപീകരിച്ചതായും തെരച്ചില്‍ ഊര്‍ജ്ജിതമാക്കിയെന്നും കൊച്ചി പൊലീസ് പ്രതികരിച്ചു.
കേസില്‍ ദേശീയ പട്ടികവര്‍ഗ കമ്മീഷന്‍ സ്വമേധയാ കേസ് എടുത്തിട്ടുണ്ട്. കൊച്ചി പൊലീസിനോട് ദേശീയ പട്ടികവര്‍ഗ കമ്മീഷന്‍ റിപ്പോര്‍ട്ട് തേടി.്‌കൊച്ചിയിലെ ഒരു വീട്ടില്‍ ജോലിക്ക് നിന്ന ഒഡീഷ സ്വദേശിനിയായ പട്ടികവര്‍ഗ വിഭാഗത്തില്‍ പെട്ട യുവതിയാണ് പീഡനത്തിന് ഇരയായത്. സംഭവത്തില്‍ ഒക്ടോബര്‍ 17 ന് മരട് പൊലീസ് സ്‌റ്റേഷനില്‍ എഫ്‌ഐആര്‍ രജിസ്റ്റര്‍ ചെയ്തങ്കിലും പ്രതി ഒളിവില്‍ പോയി.
പ്രതികരിക്കാൻ ഇവിടെ എഴുതുക: