പത്തനംതിട്ട: റോഡ് സുരക്ഷാ യോഗത്തിന് എസ്.പിക്ക് പകരമെത്തിയ എസ്‌ഐയെ തിരിച്ചയച്ച് കളക്ടര്‍ എസ് പ്രേംകൃഷ്ണന്‍. ലക്ഷങ്ങളുടെ ഫണ്ട് വിനിയോഗം അടക്കം സുപ്രധാന തീരുമാനമെടുക്കേണ്ട യോഗത്തിലാണ് ജില്ലാ പോലീസ് മേധാവി പങ്കെടുക്കാതിരുന്നത്. പ്രധാനപ്പെട്ട യോഗമായതിനാല്‍ എസ്പി തന്നെ എത്തണമെന്ന് കളക്ടര്‍ നിലപാടെടുക്കുകയായിരുന്നു.
ബുധനാഴ്ച പത്തനംതിട്ടയില്‍ നടന്ന റോഡ് സുരക്ഷായോഗത്തില്‍വച്ചാണ് സംഭവം. യോഗത്തില്‍ നിന്ന് വിട്ടുനിന്ന ജില്ലാ പോലീസ് മേധാവി വി.ജി.വിനോദ് കുമാര്‍ അസോസിയേഷൻ നേതാവ് കൂടിയായ എസ്ഐ ബി.എസ്.ശ്രീജിത്തിനെ അയക്കുകയായിരുന്നു. തിരക്ക് കൊണ്ടാണ് പങ്കെടുക്കാതിരിക്കാന്‍ കഴിയാതിരുന്നതെന്ന് അദ്ദേഹം അറിയിച്ചു. എന്നാല്‍ സുപ്രധാന യോഗത്തില്‍ എസ്പി തന്നെ പങ്കെടുക്കണമെന്ന് കളക്ടര്‍ നിലപാടെടുത്തു.
എസ്‌ഐയെ കളക്ടര്‍ തിരിച്ചയച്ചതോടെ ഒരു ഡിവൈഎസ്പിയാണ് പകരം പങ്കെടുത്തത്. മണ്ഡലകാലം അടുത്തിരിക്കെ എസ്ഐ മാത്രം പങ്കെടുത്തിട്ട് കാര്യമില്ലെന്ന് പൊലീസ് ഉദ്യോഗസ്ഥർ തന്നെ പറയുന്നു.
പ്രതികരിക്കാൻ ഇവിടെ എഴുതുക: