കേരളത്തിലെയും ദീപാവലി ആഘോഷങ്ങൾക്ക് ‘ഹരിത പടക്ക’ങ്ങൾ മാത്രം: ഹരിത പടക്കങ്ങൾ എന്താണെന്നറിയാം

ദീപാവലി ആഘോഷങ്ങളിൽ പടക്കം പൊട്ടിക്കുന്നത് രാത്രി 8 മുതൽ 10 വരെയും, ക്രിസ്മസ് – പുതുവത്സര ആഘോഷങ്ങളിൽ രാത്രി 11.55 മുതൽ പുലർച്ചെ 12.30 വരെയുമാക്കി നിയന്ത്രിച്ച് സർക്കാർ ഉത്തരവ് പുറപ്പെടുവിച്ചു. അന്തരീക്ഷ മലിനീകരണം നിയന്ത്രിക്കുന്നതിന്റെ ഭാഗമായാണ് നിയന്ത്രണം. ദേശീയ ഹരിത ട്രിബ്യൂണൽ ഉത്തരവിന്റെയും സംസ്ഥാന മലിനീകരണ നിയന്ത്രണ ബോർഡിന്റെ കത്തിന്റെയും അടിസ്ഥാനത്തിലാണ് നിർദേശം. ആഘോഷങ്ങളിൽ ഹരിത പടക്കം മാത്രമേ ഉപയോഗിക്കാൻ പാടുള്ളൂ. പടക്കം പൊട്ടിക്കുന്നതിനുള്ള സമയ നിയന്ത്രണം ഉറപ്പാക്കുന്നതിനും സംസ്ഥാനത്ത് ഹരിത പടക്കങ്ങൾ മാത്രമേ വിൽക്കുന്നുള്ളൂവെന്ന് ഉറപ്പാക്കുന്നതിനും ജില്ലാ കലക്ടർമാർക്കും ജില്ലാ പൊലീസ് മേധാവിമാർക്കും നിർദേശം നൽകി ആഭ്യന്തര വകുപ്പ് ഉത്തരവു പുറപ്പെടുവിച്ചു.

കൗണ്‍സില്‍ ഓഫ് സയന്റിഫിക് ആന്‍ഡ് ഇന്‍ഡസ്ട്രിയല്‍ റിസര്‍ച് (സിഎസ്‌ഐആര്‍), നാഷനല്‍ എന്‍വയണ്‍മെന്റല്‍ എന്‍ജിനീയറിങ് റിസര്‍ച് (എന്‍ഇഇആര്‍ഐ) എന്നിവയുടെ മേല്‍നോട്ടത്തിലാണു രാജ്യത്ത് ഹരിത പടക്കങ്ങള്‍ വികസിപ്പിച്ചത്. ജനപ്രിയ ഇനങ്ങളായ മത്താപ്പൂ, കമ്പിത്തിരി, കുടച്ചക്രം, റോക്കറ്റ് തുടങ്ങിയവയുടെ പരിഷ്‌കൃതരൂപം ഹരിത പടക്കങ്ങളില്‍ ലഭ്യമാണ്. ഹരിത പടക്കങ്ങള്‍ പരിസ്ഥിതി സൗഹൃദവും അന്തരീക്ഷ മലിനീകരണം കുറയ്‌ക്കുന്ന രീതിയിലാണ് നിര്‍മ്മിച്ചിരിക്കുന്നതെന്നതും തര്‍ക്കമറ്റതാണ്.

വര്‍ദ്ധിച്ചുവരുന്ന മലിനീകരണം കണക്കിലെടുത്ത് മാത്രമാണ് അവ നിര്‍മ്മിക്കുന്നത്. സാധാരണ പടക്കങ്ങളില്‍ വെടിമരുന്നും മറ്റ് കത്തുന്ന രാസവസ്തുക്കളും അനിയന്ത്രിതമായ അളവില്‍ അടങ്ങിയിട്ടുണ്ട്. അത് കത്തിക്കുമ്പോള്‍ പൊട്ടിത്തെറിയിലൂടടെ വലിയ അളവില്‍ മലിനീകരണം ഉണ്ടാകുന്നു. അതേസമയം, ഹരിത പടക്കങ്ങളില്‍ ദോഷകരമായ രാസവസ്തുക്കള്‍ അടങ്ങിയിട്ടില്ല, വായു മലിനീകരണം കുറവാണ്. അവ പരിസ്ഥിതി സൗഹൃദമാണ്. അതായത്, ഹരിത പടക്കങ്ങള്‍ക്ക് പരമ്പരാഗത പടക്കങ്ങളേക്കാള്‍ മലിനീകരണം കുറവാണ്.

ഹരിത പടക്കങ്ങളില്‍, സാധാരണയായി ഉപയോഗിക്കുന്ന അലൂമിനിയം, ബേരിയം, പൊട്ടാസ്യം നൈട്രേറ്റ്, കാര്‍ബണ്‍ തുടങ്ങിയ മലിനീകരണം ഉണ്ടാക്കുന്ന രാസവസ്തുക്കള്‍ നീക്കം ചെയ്യപ്പെടുകയോ അല്ലെങ്കില്‍ അളവ് 15 മുതല്‍ 30% വരെ കുറയ്‌ക്കുകയോ ചെയ്തിട്ടുണ്ട്.കൗണ്‍സില്‍ ഓഫ് സയന്റിഫിക് ആന്‍ഡ് ഇന്‍ഡസ്ട്രിയല്‍ റിസര്‍ച് (സിഎസ്‌ഐആര്‍), നാഷനല്‍ എന്‍വയണ്‍മെന്റല്‍ എന്‍ജിനീയറിങ് റിസര്‍ച് (എന്‍ഇഇആര്‍ഐ) എന്നിവയുടെ മേല്‍നോട്ടത്തിലാണ് ഹരിത പടക്കങ്ങള്‍ വികസിപ്പിച്ചത്. സര്‍ക്കാരുമായി കരാര്‍ ഒപ്പിട്ടു പുക പരിശോധന സര്‍ട്ടിഫിക്കറ്റ് നേടിയാല്‍ മാത്രമേ ഇവ നിര്‍മിച്ചു വില്‍ക്കാനാകൂ.

സര്‍ട്ടിഫിക്കറ്റ് നേടിയോ എന്നറിയാന്‍ ഹരിത ലോഗോ, ക്യുആര്‍ കോഡ് എന്നിവ പതിച്ചിട്ടുണ്ടാവും. മലിനീകരണ തോതും ശബ്ദവും കുറഞ്ഞ പടക്കങ്ങളുടെ വില്‍പനയും ഉപയോഗവും മാത്രമേ അനുവദിക്കൂവെന്ന് സുപ്രീം കോടതി വിധിച്ചതിനു പിന്നാലെയാണ് ഹരിത പടക്കങ്ങള്‍ രംഗപ്രവേശം ചെയ്തത്. സേഫ് വാട്ടര്‍ റിലീസര്‍ (SWAS), സേഫ് തെര്‍മൈറ്റ് ക്രാക്കര്‍ (STAR), സേഫ് മിനിമല്‍ അലുമിനിയം (SAFAL) എന്നിങ്ങനെയാണ് പടക്കങ്ങള്‍ക്ക് പേരിട്ടിരിക്കുന്നത്.