രാവിലെ അലാറം കേട്ടാല്‍ മാത്രം ഉണരുന്ന ശീലം നമ്മളില്‍ പലര്‍ക്കും ഉണ്ട്. അലാറമെന്നത് ഇന്ന് ഒട്ടുമിക്കവരുടെയും ജീവിത ശൈലിയുടെ ഭാഗമായി കഴിഞ്ഞിരിക്കുകയാണ്. എന്നാല്‍ പതിവായി അലാറം വച്ച് എഴുന്നേല്‍ക്കുന്നത് നമ്മുടെ ശാരീരിക അവസ്ഥയെ പ്രതികൂലമായി ബാധിച്ചേക്കാം. ഇത് സംബന്ധിച്ച് നിരവധി പഠനങ്ങളാണ് അടുത്തിടെ പുറത്ത് വന്നിരിക്കുന്നത്.
അലാറാം കേട്ട് ഉണരുന്ന ശീലം നമ്മുടെ രക്ത സമ്മര്‍ദ്ദം കൂട്ടുമെന്ന് പഠനങ്ങള്‍ പറയുന്നു. ഏഴുമണിക്കൂറില്‍ താഴെ മാത്രം ഉറങ്ങുന്നത് ഹൃദയാഘാതം, സ്ട്രോക്ക് പോലെയുള്ള രോഗങ്ങള്‍ക്ക് കാരണമാകുന്നെന്നും തെളിയിക്കുന്ന പഠന റിപ്പോര്‍ട്ടുകളാണ് പുറത്ത് വന്നിരിക്കുന്നത്. ഹൈദരാബാദ് അപ്പോളോ ഹോസ്പിറ്റല്‍സിലെ കണ്‍സള്‍ട്ടന്റ് ന്യൂറോളജിസ്റ്റ് ഡോ സുധീര്‍ കുമാര്‍ ആണ് ഇത് സംബന്ധിച്ച പഠനം നടത്തിയത്. അലാറമില്ലാതെ ഉണരുന്നവരെ അപേക്ഷിച്ച് അലാറം കേട്ട് ഉണരുന്നവരുടെ രക്തസമ്മര്‍ദ്ദത്തില്‍ 74 ശതമാനം വര്‍ദ്ധനവ് ഉണ്ടായതായി യുഎസിലെ യുവിഎ സ്‌കൂള്‍ ഓഫ് നഴ്സിംഗ് പ്രസിദ്ധീകരിച്ച റിപ്പോര്‍ട്ടില്‍ പറയുന്നു.
കൂടാതെ ഉച്ചത്തിലുള്ള അലാറം ഉറക്കം തടസ്സപ്പെടുത്തി പരിഭ്രാന്തിയും ഉത്കണ്ഠയും ഉണ്ടാക്കുകയും ശരീരത്തിലെ കോര്‍ട്ടിസോളിന്റെ അളവ് (സ്ട്രെസ് ഹോര്‍മോണ്‍) വര്‍ദ്ധിപ്പിക്കുകയും ചെയ്യും. ഇതുകാരണം ഒരു ദിവസം ആരംഭിക്കുമ്പോള്‍ തന്നെ ക്ഷോഭം, ഉത്കണ്ഠ, ദേഷ്യം, എന്നിവ നമുക്ക് അനുഭവപ്പെടുമെന്ന് മുംബൈയിലെ ഇന്റേണല്‍ മെഡിസിന്‍ സീനിയര്‍ കണ്‍സള്‍ട്ടന്റ് ഡോ. മഞ്ജുഷ അഗര്‍വാള്‍ നടത്തിയ പഠനത്തില്‍ പറയുന്നു. നിരവധി പഠനങ്ങളാണ് ഈ വിഷയത്തെ ആസ്പദമാക്കി നടന്നിട്ടുള്ളത്. ശാരീരികമായി നിരവധി അസ്വസ്ഥകളുണ്ടായേക്കാമെന്നാണ് എല്ലാ പഠനത്തിലും പരാമര്‍ശിച്ചിട്ടുള്ളത്.
പ്രതികരിക്കാൻ ഇവിടെ എഴുതുക: