കൊച്ചി: അലന്‍ വാക്കര്‍ ഷോയ്‌ക്കിടെ ലഹരി കടത്താനും ഉപയോഗിക്കാനുമുള്ള സാഹചര്യം ഉണ്ടായിരുന്നില്ലെന്ന് ഷോയുടെ സഹ സംഘാടകരായ ഇസോണ്‍ പ്രതിനിധി . മഫ്തിയിലും അല്ലാതെയുമായി 200ലധികം പൊലീസുകാര്‍ പരിപാടി നടക്കുന്ന സ്ഥലത്തുണ്ടായിരുന്നുവെന്ന് ഇസോണ്‍ പ്രതിനിധി ലിജോ ജോയ് പറഞ്ഞു.
ഗുണ്ടാ തലവന്‍ ഓം പ്രകാശിനെതിരായ ലഹരിക്കേസുമായി ബന്ധപ്പെട്ടാണ് വിശദീകരണവുമായി അലന്‍ വാക്കര്‍ ഷോയുടെ സഹസംഘാടകര്‍ രംഗത്തെത്തിയത്.
ഓം പ്രകാശുമായി ബന്ധപ്പെട്ട ലഹരി കേസില്‍ പൊലീസ് ഇതുവരെ ബന്ധപ്പെട്ടിട്ടില്ലെന്നും ലിജോ ജോയ് വെളിപ്പെടുത്തി. അലന്‍ വാക്കറുടെ ആരാധകരില്‍ കുട്ടികളാണ് കൂടുതലും. പരിപാടിക്കിടയില്‍ നടന്ന ഫോണ്‍ മോഷണത്തെക്കുറിച്ച് മുളവുകാട് പൊലീസ് വിവരങ്ങള്‍ തേടിയിട്ടുണ്ട്. പൊലീസ് ആവശ്യപ്പെട്ട സിസിടിവി ദൃശ്യങ്ങള്‍ നല്‍കുമെന്നും ലിജോ ജോയ് പറഞ്ഞു.
അതിനിടെ , ഗുണ്ടാ തലവന്‍ ഓം പ്രകാശിനെതിരായ ലഹരിക്കേസില്‍ എളമക്കര സ്വദേശി ബിനു ജോസഫിനെ പൊലീസ് കസ്റ്റഡിയിലെടുത്തു. എറണാകുളം സൗത്ത് പൊലീസ് പിടികൂടിയ ബിനുവിനെ മരട് പൊലീസിന് കൈമാറി. ഇയാളാണ് സിനിമ താരങ്ങളായ ശ്രീനാഥ് ഭാസിയെയും പ്രയാഗ മാര്‍ട്ടിനെയും ഓം പ്രകാശിന്റെ മുറിയില്‍ എത്തിച്ചെന്നാണ് സംശയം.
കുപ്രസിദ്ധ ഗുണ്ടാത്തലവന്‍ ഓം പ്രകാശിനെയും കൂട്ടാളി ഷിഹാസിനെയും സ്വകാര്യ ഹോട്ടലില്‍ നിന്ന് ഞായറാഴ്ചയാണ് കൊച്ചി മരട് പൊലീസ് അറസ്റ്റ് ചെയ്തത്. ബോള്‍ഗാട്ടി പാലസില്‍ നടന്ന അലന്‍ വാക്കര്‍ മെഗാ ഡിജെ ഷോയ്‌ക്ക് ലഹരി വസ്തുക്കള്‍ വില്‍ക്കാന്‍ ലക്ഷ്യമിട്ട് കൊച്ചിയിലെ നക്ഷത്ര ഹോട്ടലില്‍ മുറി എടുത്തെന്ന് ആരോപിച്ചായിരുന്നു അറസ്റ്റ്.ലഹരി ഉപയോഗം സംശയിക്കുന്ന തരത്തില്‍ കൊക്കെയിന്‍ അടങ്ങിയ ബാഗ് ഇവരില്‍ നിന്ന് കണ്ടെത്തി. എന്നാല്‍ കോടതി ഓം പ്രകാശിനം കൂട്ടാളി ഷിഹാസിനും ജാമ്യം നല്‍കി.
പ്രതികരിക്കാൻ ഇവിടെ എഴുതുക: