ശബരിമല നട ഇന്ന് തുറക്കും; നിറപുത്തരി നാളെ

പത്തനംതിട്ട: ശബരിമലയില്‍ ഐശ്വര്യ സമൃദ്ധിക്കായി നാളെ നടക്കുന്ന നിറപുത്തരി പൂജയ്‌ക്കു വേണ്ടി ഇന്ന് വൈകിട്ട് അഞ്ചിന് തന്ത്രി കണ്ഠര് മഹേഷ് മോഹനരുടെ സാന്നിധ്യത്തില്‍ മേല്‍ശാന്തി വി.എന്‍. മഹേഷ് നമ്പൂതിരി നടതുറക്കും. നാളെ പുലര്‍ച്ചെ 5.45നും 6.30നും ഇടയിലാണ് നിറപുത്തരി പൂജകള്‍ നടക്കുക. അതിനായി രാവിലെ 4 മണിക്ക് നട തുറക്കും.

നിറപുത്തരി പൂജയ്‌ക്കായി പ്രത്യേകം കൃഷി ചെയ്ത നെല്‍ക്കതിരുകള്‍ കറ്റകളാക്കി ഇരുമുടികെട്ടിനൊപ്പം ഭക്തര്‍ സന്നിധാനത്ത് എത്തിക്കും. നിറപുത്തരിക്കായി എത്തിക്കുന്ന നെല്‍ക്കതിരുകള്‍ കൊടിമര ചുവട്ടില്‍ സമര്‍പ്പിക്കും. അവിടെ നിന്ന് തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് പി.എസ.് പ്രശാന്ത്, അംഗങ്ങളായ ജി. സുന്ദരേശന്‍, അഡ്വ.എ. അജികുമാര്‍ എന്നിവര്‍ ചേര്‍ന്ന് ഏറ്റുവാങ്ങും.

തുടര്‍ന്ന് നെല്‍ക്കതിരുകള്‍ തന്ത്രി കണ്ഠര് മഹേഷ് മോഹനരും മേല്‍ശാന്തി വി.എന്‍. മഹേഷ് നമ്പൂതിരിയും ചേര്‍ന്ന് തീര്‍ത്ഥം തളിച്ച് ശുദ്ധിവരുത്തും. അതിനു ശേഷം നെല്‍ക്കതിരുകള്‍ ആഘോഷപൂര്‍വം സന്നിധാനം കിഴക്കേ മണ്ഡപത്തില്‍ എത്തിക്കും.

തന്ത്രി പൂജിച്ചശേഷം നെല്‍ക്കതിരുകള്‍ ശ്രീകോവിലില്‍ എത്തിച്ച് അയ്യപ്പസ്വാമിക്ക് മുന്‍പാകെ വയ്‌ക്കും. പ്രത്യേക പൂജയ്‌ക്ക് ശേഷം ദേവചൈതന്യം നിറച്ച നെല്‍ക്കതിരുകള്‍ ശ്രീകോവിലിലും സോപാനത്തും കെട്ടിയശേഷം ഭക്തര്‍ക്ക് വിതരണംചെയ്യും. പൂജകള്‍ പൂര്‍ത്തിയാക്കി നാളെ രാത്രി 10ന് നട അടയ്‌ക്കും.