ആലപ്പുഴ: കാമ്പസ് ഫ്രണ്ട് തീവ്രസ്വഭാവമുള്ള സംഘടനയല്ലെന്ന് എബിവിപി പ്രവര്‍ത്തകന്‍ വിശാല്‍ വധക്കേസിലെ സാക്ഷിയായ ഡിവൈഎഫ്ഐ നേതാവ് അഖില്‍ കോടതിയില്‍ മൊഴി നല്കി.
സംഭവ കാലത്ത് ചെങ്ങന്നൂര്‍ ക്രിസ്ത്യന്‍ കോളജിലെ എസ്എഫ്‌ഐ യുണിറ്റ് സെക്രട്ടറിയായിരുന്ന സാക്ഷി, മാവേലിക്കര അഡീഷണല്‍ സെഷന്‍സ് കോടതിയില്‍ പ്രതിഭാഗത്തിന് അനുകൂലമായി മൊഴി നല്കുകയായിരുന്നു. പോലിസിന് ഇയാള്‍ നേരത്തെ നല്കിയ മൊഴി ഇയാള്‍ കോടതിയില്‍ നിഷേധിച്ചതിനെ തുടര്‍ന്ന് കേസിലെ സ്‌പെഷല്‍ പ്രോസിക്യൂട്ടര്‍, സാക്ഷി കൂറുമാറിയതായി കണ്ട് വിശദമായ ക്രോസ് വിസ്താരം നടത്തി. എറണാകുളം മഹാരാജാസ് കോളജിലെ അഭിമന്യുവിനെ കൊലപ്പെടുത്തിയത് കാമ്പസ് ഫ്രണ്ടു കാരാണെന്ന് സമ്മതിച്ച സാക്ഷി, കണ്ണൂരില്‍ സച്ചിനെ കൊലപ്പെടുത്തിയത് കാമ്പസ് ഫ്രണ്ടുകാരല്ലേ എന്ന ചോദ്യത്തിന് അറിയില്ല എന്നാണ് മറുപടി പറഞ്ഞത്.
താന്‍ നിലവില്‍ ഡിവൈഎഫ്ഐ ചെങ്ങന്നൂര്‍ ലോക്കല്‍ കമ്മിറ്റി അംഗമാണെന്ന് മൊഴി കൊടുത്ത ഇയാള്‍, വിശാല്‍ കേസിലെ ഒന്നാം പ്രതിയായ കാമ്പസ് ഫ്രണ്ട് പ്രവര്‍ത്തകന്‍ നൈസാം, കോളജില്‍ ആദ്യവര്‍ഷത്തില്‍ എസ്എഫ്‌ഐയില്‍ പ്രവര്‍ത്തിച്ചിരുന്നതായി സമ്മതിച്ചു. വിശാലിനെ കൊലപ്പെടുത്തിയത് കാമ്പസ് ഫ്രണ്ടുകാരാണെന്ന് അറിഞ്ഞിരുന്നോ എന്ന ചോദ്യത്തിന് അറിവില്ല എന്നും കേസിലെ പ്രതികളായ നിസാം, ആസിഫ് തുടങ്ങിയവര്‍ കോളജിലെ കാമ്പസ് ഫ്രണ്ടുകാരാണെന്നും സാക്ഷി കോടതിയില്‍ പറഞ്ഞു. തുടര്‍ സാക്ഷി വിസ്താരം വെള്ളിയാഴ്ച നടക്കും. കേസില്‍ പ്രോസിക്യൂഷന് വേണ്ടി അഡ്വ. പ്രതാപ് ജി പടിക്കലിനോടൊപ്പം അഭിഭാഷകരായ ശ്രീദേവി പ്രതാപ്, ശില്പ ശിവന്‍, ഹരീഷ് കാട്ടൂര്‍ എന്നിവരാണ് ഹാജരാകുന്നത്.
പ്രതികരിക്കാൻ ഇവിടെ എഴുതുക: