ബെംഗളൂരു: കര്‍ണാടകയില്‍ സ്വകാര്യമേഖലയില്‍ തദ്ദേശീയര്‍ക്ക് 100 ശതമാനം വരെ സംവരണം നല്‍കിക്കൊണ്ട് മന്ത്രിസഭ അംഗീകാരം നല്‍കിയ ബില്ല് മരവിപ്പിച്ചു. ഐടി മേഖലയില്‍ നിന്നുള്‍പ്പടെ പ്രതിഷേധങ്ങള്‍ ഉയര്‍ന്നതിന് പിന്നാലെയാണ് ബില്ല് താല്‍കാലികമായി മരവിപ്പിച്ചത്. വ്യവസായ മേഖലയുമായി ആലോചിച്ച് പരിശോധനകള്‍ നടത്തിയ ശേഷമാകും വിഷയത്തില്‍ തീരുമാനമെടുക്കുക.
സര്‍ക്കാര്‍ ബില്ല് മരവിപ്പിച്ചതായി മുഖ്യമന്ത്രി സിദ്ധരാമയ്യയാണ് എക്‌സിലൂടെ അറിയിച്ചത്. അടുത്ത മന്ത്രിസഭാ യോഗത്തില്‍ വിഷയം ഗൗരവമായി ചര്‍ച്ചചെയ്യാനാണ് തീരുമാനം. കര്‍ണാടകയില്‍ സ്വകാര്യമേഖലയില്‍ ഇനി തദ്ദേശീയര്‍ക്ക് 100 ശതമാനം വരെ സംവരണം നല്‍കുന്ന ബില്ലിനാണ് മന്ത്രിസഭ ആദ്യം അംഗീകാരം നല്‍കിയത്.
സംസ്ഥാനത്തെ വ്യവസായ മേഖലയില്‍ തദ്ദേശീയര്‍ക്ക് 75 ശതമാനം വരെ നിയമനങ്ങള്‍ സംവരണം ചെയ്യാന്‍ ലക്ഷ്യമിടുന്നതായിരുന്നു ബില്ല്. കര്‍ണാടകത്തില്‍ ജനിച്ചുവളര്‍ന്നവര്‍ക്കൊപ്പം 15 വര്‍ഷമായി കര്‍ണാടകത്തില്‍ സ്ഥിരതാമസമാക്കിയവരും കന്നഡ എഴുതാനും വായിക്കാനും പറയാനും അറിയുന്നവരുമായവര്‍ക്ക് സംവരണം നല്‍കാനായിരുന്നു ബില്ലിലെ വ്യവസ്ഥ.
The draft bill intended to provide reservations for Kannadigas in private sector companies, industries, and enterprises is still in the preparation stage.
A comprehensive discussion will be held in the next cabinet meeting to make a final decision.
— Siddaramaiah (@siddaramaiah) July 17, 2024
ബില്ലിനെതിരെ പ്രതിഷേധം ശക്തമായതോടെയാണ് സര്‍ക്കാരിന്റെ പിന്മാറ്റം. കര്‍ണാടകയില്‍ ജോലി ചെയ്യുന്ന, തൊഴില്‍ തേടുന്ന മലയാളികളുടെ നിലനില്‍പ്പു ഭീഷണിയിലാകുമെന്നും. മലയാളികള്‍ തൊഴിലിനായി ഏറ്റവുമധികം ആശ്രയിക്കുന്ന നഗരമാണ് ബെംഗളൂരു. സ്വകാര്യ മേഖലയിലെ ജോലിക്കാരില്‍ 50 ശതമാനവും മലയാളികളാണ്. പുതിയ ബില്‍ നിയമസഭ പാസാക്കിയാല്‍ കേരളം, തമിഴ്‌നാട്, ആന്ധ്ര സംസ്ഥാനങ്ങളില്‍ നിന്നുള്ളവര്‍ തെരുവിലാകും.
മലയാളികള്‍ അടക്കം ഇതര സംസ്ഥാനങ്ങളില്‍ നിന്നുള്ളവരോടുള്ള ക്രൂരതയാണ് ബില്ലെന്ന് ബിജെപി ചൂണ്ടിക്കാട്ടി. കന്നഡിഗര്‍ക്ക് സംവരണം നല്ലതാണ്. എന്നാല്‍ മറ്റുള്ളവരുടെ അന്നം മുടക്കിയാകരുത് സര്‍ക്കാരിന്റെ തീരുമാനമെന്ന് സംസ്ഥാന ബിജെപി അധ്യക്ഷന്‍ ബി.വൈ. വിജയേന്ദ്ര പറഞ്ഞു. ബില്ലിനെതിരേ കടുത്ത പ്രതിഷേധമാണുയരുന്നത്.
ഒരു സര്‍ക്കാര്‍ ഓഫീസര്‍ ഇരുന്ന് സ്വകാര്യ സ്ഥാപനങ്ങളിലേക്കുള്ള നിയമനം നടത്താന്‍ തീരുമാനിക്കുന്നത് ഭരണഘടനാ വിരുദ്ധമാണെന്ന് മണിപ്പാല്‍ ഗ്രൂപ്പ് ചെയര്‍മാന്‍ മോഹന്‍ദാസ് പൈ അഭിപ്രായപ്പെട്ടു. ബെംഗളൂരുവിലെ ടെക് കമ്പനികളെ അടക്കം ഒറ്റയടിക്കു പേടിപ്പിച്ചോടിക്കുന്ന ബില്ലാണിതെന്ന് ബയോകോണ്‍ ലിമിറ്റഡ് ചെയര്‍ പേഴ്‌സണ്‍ കിരണ്‍ മജുംദാര്‍ ഷാ വിമര്‍ശിച്ചു.
സംസ്ഥാന സര്‍ക്കാരിന്റെ തദ്ദേശീയ സംവരണ ബില്ലിനെതിരെ പ്രതികരിച്ച് ബെംഗളൂരു സംരംഭകരും രംഗത്തെത്തിയിരുന്നു. അഞ്ച് ലക്ഷത്തിലധികം സ്റ്റാര്‍ട്ടപ്പുകളും ആഗോള എംഎന്‍സികളും പ്രവര്‍ത്തിക്കുന്ന ബെംഗളൂരു നഗരത്തില്‍ കന്നഡിഗ സംവരണ ബില്‍ നടപ്പിലാക്കിക്കൊണ്ട് സ്ഥാപനങ്ങള്‍ മുന്നോട്ടു കൊണ്ടുപോകാന്‍ കഴിയില്ലെന്ന് സംരംഭകര്‍ വ്യക്തമാക്കി. സൗഹൃദപരമായതും വ്യവസായങ്ങളെ സ്വാഗതം ചെയ്യുന്നതുമായ നഗരം എന്ന ബെംഗളൂരുവിന്റെ വിശേഷണത്തെ ഇല്ലാതാക്കുന്നതാണ് കര്‍ണാടക സര്‍ക്കാരിന്റെ പുതിയ ബില്ലെന്നും സ്ഥാപന ഉടമകള്‍ ചൂണ്ടിക്കാട്ടി.
ബില്ലിലെ നിര്‍ദ്ദേശങ്ങള്‍ പാലിച്ചുകൊണ്ട് മുന്നോട്ടുപോകാന്‍ ഒരു കോര്‍പ്പറേറ്റ് സ്ഥാപനത്തിനും കഴിയില്ല. സംരംഭകരുമായോ സ്ഥാപന ഉടമകളുമായോ യാതൊരു കൂടിയാലോചനകളും നടത്താതെയാണ് ഇത്തരമൊരു ബില്‍ സര്‍ക്കാര്‍ നടപ്പിലാക്കാന്‍ ഒരുങ്ങുന്നത്. ബില്‍ നടപ്പിലാക്കുകയാണെങ്കില്‍ ബിസിനസ് ഹൈദരാബാദിലേക്കോ ഗുരുഗ്രാമിലേക്കോ മാറ്റാനാണ് തങ്ങള്‍ ഉദ്ദേശിക്കുന്നത് എന്നും സംരംഭകര്‍ വ്യക്തമാക്കി.
പ്രതികരിക്കാൻ ഇവിടെ എഴുതുക: