തൃശൂര്‍ : ഈ മാസം 19ന് പുതിയ ന്യൂനമര്‍ദ്ദം രൂപപ്പെടുമെന്നും അത് ഇടുക്കിയില്‍ കൂടുതല്‍ ബാധിക്കാന്‍ സാധ്യതയുണ്ടെന്നും റവന്യു മന്ത്രി കെ രാജന്‍ പറഞ്ഞു. ഉത്തര കേരളത്തില്‍ കനത്ത മഴ തുടരും . ഓഗസ്റ്റ് 3 വരെ മഴ ഏറ്റക്കുറച്ചിലുകളോടെ പെയ്യുമെന്നും മന്ത്രി പറഞ്ഞു.
രാത്രിയാത്ര പരമാവധി ഒഴിവാക്കണമെന്ന് മന്ത്രി നിര്‍ദേശിച്ചു. മണ്ണിടിച്ചില്‍, ഉരുള്‍പൊട്ടല്‍ എന്നിവയ്‌ക്ക് സാധ്യത കൂടുതലാണെന്നും മന്ത്രി രാജന്‍ പറഞ്ഞു.
മുന്നറിയിപ്പ് ലഭിക്കുന്നതിന് അനുസരിച്ച് ക്യാമ്പുകള്‍ ഒരുക്കാന്‍ സര്‍ക്കാര്‍ തീരുമാനിച്ചിട്ടുണ്ട്. കാസര്‍കോട് , കണ്ണൂര്‍ ജില്ലകളില്‍ പുതിയ ഹോട്ട് സ്‌പോട്ടുകള്‍ രൂപപ്പെട്ടു. പാലക്കാട് , മലപ്പുറം , വയനാട്, തൃശൂര്‍ ജില്ലകളില്‍ അപകട സാധ്യതയുള്ള പുതിയ സ്ഥലങ്ങള്‍ കണ്ടെത്തി. മണ്ണെടുപ്പ് നടക്കുന്ന സ്ഥലങ്ങളും മണ്ണിടിച്ചില്‍ സാധ്യതയുള്ള സ്ഥലങ്ങളുമാണ് ഏറെയുമെന്ന് മന്ത്രി രാജന്‍ പറഞ്ഞു.
മരങ്ങള്‍ വീണ് അപകടമുണ്ടാകാനുള്ള സാധ്യതയുളളതിനാല്‍ അപകടാവസ്ഥയില്‍ ഉള്ള പൊതു മരങ്ങള്‍ മാറ്റാന്‍ നടപടി എടുക്കണം. മരം മുറിക്കുന്നത് സംബന്ധിച്ച തര്‍ക്കങ്ങള്‍ പഞ്ചായത്ത് സെക്രട്ടറിക്ക് തന്നെ പരിഹരിക്കാം. പരസ്യ ബോര്‍ഡുകള്‍ പൊതു നിരത്തില്‍ നിന്ന് എടുത്ത് മാറ്റുകയോ ബലപ്പെടുത്തുകയോ ചെയ്യണമെന്ന് മന്ത്രി നിര്‍ദേശിച്ചു. ഏറ്റവും കൂടുതല്‍ നാശനഷ്ടവും ജീവഹാനിയും കാറ്റ് മൂലമാണുണ്ടായത്. . കെഎസ്ഇബി കണ്ട്രോള്‍ റൂം നമ്പര്‍ (1912) തുറന്നിട്ടുണ്ട്.
പ്രതികരിക്കാൻ ഇവിടെ എഴുതുക: