ന്യൂദല്‍ഹി: മുതിര്‍ന്ന ലോക്സഭാംഗവും ഒഡീഷയില്‍ നിന്നുള്ള ബിജെപി നേതാവുമായ ഭര്‍തൃഹരി മഹ്തബിനെ ലോക്സഭയുടെ പ്രോടേം സ്പീക്കറായി നിയമിച്ചു. രാഷ്‌ട്രപതി ദ്രൗപദി മുര്‍മുവാണ് ഏഴുവട്ടം ലോക്സഭാംഗമായ ഭര്‍തൃഹരിയെ പ്രോടേം സ്പീക്കറായി നിയമിച്ചത്.
ഭരണഘടനയുടെ 95(1) ചട്ടപ്രകാരം ലോക്സഭാ സ്പീക്കറുടെ തെരഞ്ഞെടുപ്പു വരെയുള്ള സഭാ നടപടികള്‍ ഭര്‍തൃഹരി നിയന്ത്രിക്കും. എംപിമാരായ കൊടിക്കുന്നില്‍ സുരേഷ്, ടി.ആര്‍ ബാലു, രാധാമോഹന്‍ സിങ്, ഫഗ്ഗന്‍സിങ് കുലസ്തെ, സുദീപ് ബന്ദോപാധ്യായ എന്നിവരെ എംപിമാരുടെ സത്യപ്രതിജ്ഞ അടക്കമുള്ള നടപടികളില്‍ പ്രോടേം സ്പീക്കറെ സഹായിക്കാനും രാഷ്‌ട്രപതി നിയമിച്ചിട്ടുണ്ട്.
ലോക്സഭയുടെ ആദ്യ സിറ്റിംഗില്‍ അദ്ധ്യക്ഷത വഹിക്കുന്ന പ്രോടേം സ്പീക്കര്‍ പുതുതായി തെരഞ്ഞെടുക്കപ്പെട്ട എംപിമാര്‍ക്ക് സത്യവാചകം ചൊല്ലിക്കൊടുക്കും. 18ാമത് ലോക്സഭയുടെ സ്പീക്കര്‍ തെരഞ്ഞെടുപ്പിന് മേല്‍നോട്ടം വഹിക്കുന്നതും ഭര്‍തൃഹരിയായിരിക്കും.
പാര്‍ലമെന്റിലെ ഏറ്റവും മുതിര്‍ന്ന അംഗത്തിനാണ് പ്രോടേം സ്പീക്കറുടെ ചുമതല നല്‍കുക. ഒഡിഷയില്‍ നിന്നുള്ള ബിജെപി നേതാവാണ് ഭര്‍തൃഹരി. കട്ടക്കില്‍ നിന്ന് ഏഴ് തവണയാണ് അദ്ദേഹം പാര്‍ലമെന്റിലേക്ക് തിരഞ്ഞെടുക്കപ്പെട്ടത്. ഒഡിഷ മുന്‍ മുഖ്യമന്ത്രി ഹരേകൃഷ്ണ മഹ്താബിന്റെ മകനാണ്. 2024ലെ ലോക്സഭാ തെരഞ്ഞെടുപ്പിന് മുന്നോടിയായിട്ടായിരുന്നു ബിജു ജനതാ ദളുമായി പിരിഞ്ഞ് അദ്ദേഹം ബിജെപിയിലെത്തിയത്.
ജൂണ്‍ 26നാണ് സ്പീക്കര്‍ തെരഞ്ഞെടുപ്പ്. 24ന് പുതിയ ലോക്സഭയുടെ ഉദ്ഘാടന സമ്മേളനം ആരംഭിക്കും. ജൂലൈ മൂന്നിനാണ് സമ്മേളനം അവസാനിക്കുക.
പ്രതികരിക്കാൻ ഇവിടെ എഴുതുക: