കാസര്‍കോട്: ലൈഫ് പദ്ധതിയില്‍ വീടിനായി നല്‍കിയ രേഖകള്‍ തിരികെ വാങ്ങാനെത്തിയ സ്ത്രീയെ പഞ്ചായത്ത് ഓഫീസില്‍ പൂട്ടിയിട്ടെന്ന് പരാതി.കോട്ടവളപ്പിലെ സാവിത്രിയെ ആണ് മൊഗ്രാല്‍ പുത്തൂര്‍ പഞ്ചായത്ത് ഓഫീസില്‍ പൂട്ടിയിട്ടത്. സാവിത്രിയുടെ പരാതിയില്‍ വില്ലേജ് എക്‌സറ്റന്‍ഷന്‍ ഓഫീസര്‍ എം അബ്ദുല്‍ നാസറിനെതിരെ കേസെടുത്തു.
ഇന്നലെയാണ് സംഭവം.ലൈഫ് പദ്ധതി പ്രകാരം വീടിനായി സാവിത്രി അപേക്ഷിച്ചിരുന്നു. വീട് അനുവദിച്ചെന്ന അറിയിപ്പ് പ്രകാരം ഷെഡ് പൊളിച്ചുമാറ്റി വീട് നിര്‍മാണം തുടങ്ങി. എന്നാല്‍ ഫണ്ട് അനുവദിച്ചില്ല. മറ്റൊരു സാവിത്രിക്കാണ് വീട് അനുവദിച്ചതെന്നും മാറിപ്പോയെന്നുമാണ് പഞ്ചായത്ത് അധികൃതര്‍ പറഞ്ഞത്. അങ്ങനെയെങ്കില്‍ താന്‍ നല്‍കിയ രേഖകള്‍ തിരിച്ചു തരണമെന്ന് സാവിത്രി ആവശ്യപ്പെട്ടു. ചില രേഖകള്‍ നല്‍കിയെങ്കിലും എല്ലാ രേഖകളും നല്‍കാത്തതിനാല്‍ സാവിത്രി കുത്തിയിരിപ്പ് തുടങ്ങി.
ഇതോടെ വില്ലേജ് എക്‌സറ്റന്‍ഷന്‍ ഓഫീസര്‍ വാതില്‍ പുറത്തു നിന്ന് പൂട്ടി പോയെന്നാണ് സാവിത്രിയുടെ പരാതി. സാവിത്രി നല്‍കിയ പരാതിയില്‍ വിഇഒയ്‌ക്കെതിരെ കേസെടുത്ത പൊലീസ് ഔദ്യോഗിക കൃത്യനിര്‍വ്വഹണം തടസപ്പെടുത്തിയെന്ന വിഇഒയുടെ പരാതിയില്‍ സാവിത്രിക്കെതിരെയും കേസെടുത്തു.
പ്രതികരിക്കാൻ ഇവിടെ എഴുതുക: